Qaraǧandy oblysynyŋ polisiia qyzmetkerlerı respublikalyq maŋyzy bar avtojoldarda kölık jürgızuşılerımen profilaktikalyq äŋgımeler jürgızıp, kezektı reid jürgızdı, dep habarlaidy “Adyrna”.
Aqparatqa säikes, şara barysynda jolda ūzaq uaqyt jürgen, şarşaǧan ärı ūiqyly jürgızuşılerge erekşe nazar audaryldy. Mūndai jaǧdailarda olardyŋ ärı qarai jüruıne jol berılmei, demalyp alu üşın mäjbürlı türde toqtatyldy.
Patruldık polisiia batalonynyŋ komandirı Medet Nūrmūhanovtyŋ aituynşa, būl – jol-kölık oqiǧalarynyŋ aldyn aludyŋ tiımdı täsılderınıŋ bırı.
Statistikalyq mälımetterge säikes, jyl basynan berı oblys aumaǧynda 482 jol-kölık oqiǧasy tırkelıp, sonyŋ saldarynan 96 adam köz jūmǧan. Onyŋ ışınde 50-den astam oqiǧa jürgızuşılerdıŋ ūiyqtap ketuınen bolǧan.
“Sondyqtan da şarşaǧan, ūiqyly jürgızuşılerdı uaqytyly toqtatu – adam ömırın saqtap qaluǧa yqpal etetın basty şaralardyŋ bırı”, – dedı Medet Nūrmūhanov.
Reid barysynda Qaraǧandy — Balqaş baǧytynda 15 kölık toqtatylyp, jürgızuşılerdıŋ ärı qarai jolǧa şyǧuyna uaqytşa şekteu qoiyldy.
“Qazaqstanda bızdı polisiia qyzmetkerlerı toqtatyp, şarşasaq demaluymyzdy ötındı. Būl öte dūrys. Öitkenı köptegen jol-kölık oqiǧasyn körıp jürmız. Polisiia tün ışınde bızdıŋ qauıpsızdıgımızdı oilap, jolǧa şyqpaudy sūrap jatyr. Polisiianyŋ baryna raqmet”, — dedı Özbekstan azamaty Ahrorbek Kambarov.
Qaraǧandy oblysy polisiia departamentı bastyǧynyŋ orynbasary Jasqairat Qaiyrovtyŋ aituynşa, būl bastama jürgızuşılerdıŋ qauıpsızdıgı üşın jasalyp otyr.
“Jürgızuşılerdıŋ qauıpsızdıgın qamtamasyz etu maqsatynda bız oblys prokuraturasymen bırlesıp, jaŋa jüienı engızbekpız. Iаǧni 8 saǧattan artyq jol jürgen jürgızuşıler turaly aqparat avtomatty türde polisiia qyzmetkerlerınıŋ planşetterıne tüsedı. Uaqytynan artyq jürgen jaǧdaida, bız olardy toqtatyp, ärı qarai demalǧanǧa deiın jolǧa şyǧarmaimyz. Qaraǧandy toǧyz joldyŋ toraby bolǧandyqtan, kölıkter köbıne tün ortasy nemese taŋǧy uaqytta keledı. Däl osy mezgılde ūiyqtap ketu qaupı joǧary bolady. Eger jüie tolyq ıske qosylsa, jol-kölık oqiǧalarynyŋ edäuır azaiatynyna senemız”, – dedı Jasqairat Qaiyrov.
