29 qyrküiek künı Qazaqstan Prezidentı Qasym-Jomart Toqaev İtaliia prezidentı Serdjo Mattarellany dostyq pen yntymaqtastyqty nyǧaitudaǧy eŋbegı üşın I därejelı «Dostyq» ordenımen marapattady, dep habarlaidy "Adyrna" ūlttyq portaly.
Marapattau räsımınde Memleket basşysy italiialyq ärıptesınıŋ elınde jäne halyqaralyq deŋgeide zor bedelge ie saiasi qairatker ekenın atap öttı.
Sondai-aq İtaliianyŋ ekonomika, innovasiialyq tehnologiialar, ekologiia jäne «jasyl» energetika salasyndaǧy jetıstıkterın joǧary baǧalap, Serdjo Mattarellanyŋ qazaq-italiia bailanystaryn tereŋdetuge qosqan ülesıne erekşe toqtaldy.
Öz kezegınde Serdjo Mattarella Qasym-Jomart Toqaevqa İtaliianyŋ eŋ joǧary memlekettık nagradasy – «İtaliia Respublikasyna sıŋırgen eŋbegı üşın» ordenın tabys ettı.
– Elımızdıŋ būl joǧary nagradasy İtaliiamen dostyq qatynasty nyǧaituǧa üles qosqan memleketter basşylaryna ǧana berıledı. Sızdıŋ älemdık tärtıptı qamtamasyz etuge jäne beibıtşılıktı qoldauǧa baǧyttalǧan qyzmetıŋızdı joǧary baǧalaimyz. Sondai-aq İtaliia men Qazaqstan arasyndaǧy yntymaqtastyqty damytuǧa ūdaiy atsalysyp kele jatqanyŋyz üşın rizaşylyq bıldıremız. Sızge tabystalyp otyrǧan būl marapat bızdıŋ Respublikamyzǧa sıŋırgen eŋbegıŋızdıŋ baǧasy, – dedı İtaliia prezidentı.
Qasym-Jomart Toqaev būl joǧary marapatty zor märtebe dep atap, Serdjo Mattarellaǧa rizaşylyǧyn bıldırdı.
Aita keteiık, bügın Astanaǧa İtaliia prezidentı Serdjo Mattarella resmi saparmen keldı.
