Resei prezidentı Vladimir Putin AQŞ prezidentı Donald Tramptyŋ Budapeştte ötuı tiıs sammitke qatysty sözın tüsındırdı. Onyŋ aituynşa, būl kezdesu joiylǧan joq, tek keiınge şegerıldı. Mälımdeme 23 qazan künı Mäskeude jasaldy, dep habarlaidy "Adyrna" Kremldıŋ resmi saityna sıltep.
Putinnıŋ aituynşa, AQŞ prezidentı kezdesudı keiınge qaldyru turaly aitqan.
«Dialog ärdaiym qaqtyǧystan da, daudan da, soǧystan da jaqsy. Bız ärqaşan kelıssözder jalǧasqanyn qalap keldık jäne qazır de qoldaimyz», - dedı ol.
Sondai-aq Resei basşysy:
«Būl kezdesuge men de, AQŞ prezidentı de jeŋıl qaramauymyz kerek. Kezdesuden kütken nätije şyqpai qalsa, būl qatelık bolar edı», - dep atap öttı.
Onyŋ sözınşe, Budapeşt sammitın ötkızu bastamasyn AQŞ ūsynǧan, al oǧan deiın memlekettık hatşy Marko Rubio men Resei Syrtqy ıster ministrı Sergei Lavrovtyŋ kezdesuı josparlanǧan.
Putin AQŞ engızgen jaŋa sanksiialarǧa da pıkır bıldırdı. Ol şekteulerdıŋ «eleulı saldary boluy mümkın» ekenın moiyndaǧanymen, olardyŋ Resei ekonomikasyna aitarlyqtai äser etpeitınıne senımdı ekenın aitty.
«Būl – Reseige qysym körsetu äreketı. Bıraq özın qūrmetteitın eşbır memleket qysymmen şeşım qabyldamaidy», — dedı Putin.
Sondai-aq ol jaŋa sanksiialar ekı el arasyndaǧy qatynastardyŋ qaita jandanuyna kedergı keltırıp otyrǧanyn aitty.
«AQŞ äkımşılıgınıŋ mūndai qadamdary Resei men Amerika arasyndaǧy qarym-qatynasqa ziian keltıredı», - dep tüiındedı Resei prezidentı.
Eske salaiyq, 16 qazanda Putin men Tramp telefon arqyly söilesıp, Ukrainadaǧy jaǧdaidy talqylaǧan edı. Keiınnen köşbasşylardyŋ aldaǧy ekı apta ışınde Budapeştte jeke kezdesu ötkızuge kelısımge kelgenın aityldy, alaida naqty uaqyty belgılenbegen bolatyn. Al 17 qazanda Tramp Aq üide Zelenskiimen jolyqqan edı.
Budapeştegı kezdesu bola qalsa, Zelenskii oǧan özınıŋ de qatysa alatynyn mälımdegen.
Al Europa elderı Budapeştke Putinnıŋ ūşaǧyn ötkızbeitının jariialaǧan. Litva tıptı "Putinge Europada tek Gaagada oryn baryn" jariialaǧan, Halyqaralyq qylmystyq sotqa sıltep. Halyqaralyq qylmystyq sot Putin barsa, sol elderdı ony ūstap sotqa tapsyruǧa mındettegen. Putin taiauda Duşanbege saparlaǧan kezınde Halyqaralyq qylmystyq sot Putindı ūstamaǧany üşın Täjıkstandy aiyptaǧan.
Odan keiın Tramp jaqyn arada Resei basşysy Vladimir Putinmen kezdespeitının aitty. Būl turaly Aq üi de resmi rastaǧan.
