Qazaqstandyq tanymal käsıpker Dulat Tastekei semeilık «Elımai» futbol klubynyŋ aksiialaryn satyp alyp, investor boluy mümkın ekendıgı turaly aqparat tarady, dep habarlaidy "Adyrna" ūlttyq portaly.
Dulat Tastekei Abai oblysynyŋ tumasy, al atalmyş aimaqtyŋ namysyn bügıngı künı Premer-ligada qorǧap jürgen jalǧyz ūjym – «Elımai». Klub keler jyly UEFA Konferensiialar ligasynyŋ ırıkteuınde baq synauǧa daiyndalyp otyr.
Derekközdıŋ aituynşa, el futbolyn damytu Tastekeidıŋ jobasynda būrynnan bar josparlardyŋ bırı bolyp tabylady.
Eske salsaq, 2025 jyldyŋ tamyzynda «Elımai» resmi türde kommersiialyq emes aksionerlık qoǧamǧa ainaldy. Klub elımızde korporativtık basqaru modelın engızgen alǧaşqy ūjym boldy. Älemdık täjıribege süiene otyryp, model «Real Madrid», «Barselona», «Bavariia» siiaqty jetekşı europalyq klubtarǧa ūqsas türde qūryldy. Kapital 100 mln teŋge kölemınde aksiia şyǧaru arqyly qalyptastyryldy, qazırgı taŋda klub aksionerlerı qatarynda qoǧam qairatkerlerı, tanymal sportşylar jäne ısker tūlǧalar bar.
Tastekeidıŋ «Elımaiǧa» qyzyǧuşylyǧy Qazaqstandaǧy futbol klubtaryn kezeŋ-kezeŋımen qarjylandyru prosesımen säikes keledı. Būǧan deiın Qazaq Stroy kompaniiasynyŋ iesı Nūrlan Artyqbaev «Aqtöbe» futbol klubyna investor bolǧan. Sondai-aq Qazaqstan Premer-ligasynda öner körsetetın taǧy üş ūjym investor tartqan bolatyn.
Qyzylordalyq «Qaisar» TAU Group Ltd kompaniiasynyŋ iesı İslamǧali Qozbaqovqa öttı. İnvestisiia kölemı – 12 mlrd teŋge. Petropavldyq «Qyzyljarǧa» SATEK kompaniiasynyŋ iesı Sergei Kann ielık ettı. Käsıpker klubqa jyl saiyn kemınde 1 mlrd teŋge saluǧa mındettendı.
Elordalyq «Jeŋıstı» Mihail Lomtadzege berıldı. Ol klubqa arnalǧan futbol akademiiasyn qūruǧa 16 mlrd teŋge jūmsauǧa daiyn ekenın mälımdegen.
Sonymen qatar, qaraǧandylyq «Şahter» kluby käsıpker Timur Turlovtyŋ qol astyna öttı. Tanymal käsıpker «kenşılerge» 18 mlrd teŋge böletının jariialaǧan edı.
Qazırgı uaqytta «Taraz» pen «Ertıs» klubtary ırı investorlarmen kelıssözder jürgızude.
