Özbekstanda 27 jyl boiy maqta salasy ǧylymi täsılsız damyp, sonyŋ saldarynan alqaptardaǧy eŋbek jaǧdaiy auyr boldy. Būl turaly el prezidentı Şavkat Mirziioev Syrdariia oblysynyŋ fermerlerımen ötken kezdesude aitty, dep habarlaidy «Adyrna» tılşısı «Özbekstan 24» telearnasyna sılteme jasap.
«Ömırımız maqta alqabynda bosqa ötıptı. 27 jyl qinaldyq. Barlyǧymyz alqaptardaǧy «maqta apatyn» közımızben kördık, bıraq nätije bolmady. Būryn barlyǧyn alqaptarǧa aidap şyǧatyn. Aqşa da, tehnika da bermeitın, ǧalymdarǧa degen qūrmet bolmady. Tıptı Syrdariia oblysynda bır gektardan 25 sentner de jinai almadyq. Eŋ bastysy – būryn özımız öndırgen maqta şyǧyndarymyzdy da jappaityn», – dedı Mirziioev.
Prezident qazırgı taŋdaǧy önımdılık körsetkışterın mysalǧa keltırdı. Ol Jyzzahtan şyqqan bır fermerdıŋ gektarynan 85 sentner maqta jinaǧanyn aitty. Syrdariiadaǧy kezdesude jergılıktı diqan «87» sortynan 76 sentner maqta alǧanyn aityp, mūny ǧajaiypqa balady. Onyŋ sözınşe, adamdardyŋ eŋbegıne degen qyzyǧuşylyǧy artqan, öitkenı olar öz eŋbegınen naqty tabys köre bastaǧan.
Memleket basşysy qazır eldıŋ dūrys baǧytta kele jatqanyn, bıraq jūmysty älı de jetıldıru qajet ekenın atap öttı. 2026 jylǧa qarai Özbekstanda 4,5 mln tonna şittı maqta daiyndau maqsaty qoiylǧan. 2025 jyly elde 3,765 mln tonna jinalǧanyn edı.
Eske salaiyq, Özbekstanda maqtany küşpen jinatu ondaǧan jyldar boiy, atap aitsaq, keŋestık kezeŋde de, İslam Karimov prezident bolǧan (1991–2016 jj.) tūsta da jalǧasyp keldı. Būl uaqytta Mirziioev premer-ministr qyzmetın (2003-2016 jj.) atqarǧan edı. Jyl saiyn maqta alqaptaryna biudjet salasynyŋ jäne jeke ūiymdardyŋ qyzmetkerlerın, studentter men oquşylardy jappai şyǧaratyn. 2000-jyldardyŋ ortasynda Cotton Campaign halyqaralyq koalisiiasy Uzbek Cotton Pledge aksiiasyn bastap, oǧan şamamen 300 kiım brendı qosyldy. Olar Özbekstanda maqta jinaudaǧy mäjbürlı eŋbek joiylǧanşa, özbek maqtasyn paidalanbaityndaryn jetkızdı.
