Qazaqstanda teledidar köru aitarlyqtai artty. Soŋǧy zertteulerge qaraǧanda, el boiynşa teledidar auditoriiasy 21% ösken. Būl ösımnıŋ negızgı bölıgı şaǧyn qalalar men auyldardyŋ enşısınde.
Jeltoqsannyŋ 24-ı künı Almatyda Ūlttyq media qauymdastyǧynyŋ jyldy qorytyndylaǧan jiyny öttı. Sol jerde 2025 jylǧa arnalǧan zertteu nätijelerı men şaǧyn qalalar men auyldardaǧy teledidar körermenın ölşeu boiynşa jürgızılgen synaq jūmystarynyŋ qorytyndysy jariialandy.
Biyl qazan aiynan bastap Ūlttyq media qauymdastyǧy K Research Central Asia kompaniiasymen bırge teledidar körudı ölşeudıŋ aiasyn keŋeittı. Osylaişa, būryn tek halqy köp qalalarmen şektelıp kelgen zertteuge alǧaş ret auyldar men şaǧyn qalalar da kırdı. Būǧan deiın teledidar körsetkışterı tek 100 myŋnan astam tūrǧyny bar 21 qalada ǧana esepteletın.
Zertteu teledidardyŋ älı de el ışındegı eŋ yqpaldy aqparat közderınıŋ bırı ekenın körsettı. Äsırese öŋırlerde teledidardyŋ orny bölek. Şaǧyn qalalar men auyl tūrǧyndary künıne orta eseppen 198 minut teledidar köredı. Būl ırı qalalardaǧy körsetkışten 21 minutqa artyq. Al ülken qalalarda halyq teledidarǧa künıne orta eseppen 177 minut böledı.
Otandyq telearnalardyŋ körermenı de öŋırlerde äldeqaida köp. Şaǧyn qalalar men auyldardaǧy ortaşa täulıktık körsetkış ırı qalalarmen salystyrǧanda 40 paiyzǧa joǧary. Sonyŋ nätijesınde el boiynşa teledidar körermenınıŋ jalpy sany artqan.
Kün saiyn teledidar qaraityndardyŋ ülesı de öŋırlerde basym. Auyldar men şaǧyn qalalarda halyqtyŋ 44% teledidardy künde köredı. Al ırı qalalarda būl körsetkış 35% şamasynda. Jalpy respublika boiynşa kündelıktı qamtu deŋgeiı 40% jetıp otyr.
Zertteu taǧy bır maŋyzdy jaitty körsettı: teledidardyŋ jas körermenı bügınde öŋırlerde qalyptasyp keledı. Şaǧyn qalalar men auyldarda 18–24 jas aralyǧyndaǧy jastar teledidardy belsendırek köredı. Būl toptyŋ ülesı 27%. Al ırı qalalarda teledidardy negızınen 45 jastan asqan körermender köbırek qaraidy.
Sonymen bırge öŋırlerde teledidardy qazaq tılınde köretınderdıŋ ülesı basym. Auyldar men şaǧyn qalalarda körermennıŋ 82% qazaq tılındegı kontenttı taŋdaidy. Al ülken qalalarda būl körsetkış 59% qūraidy.
Ūlttyq media qauymdastyǧynyŋ Baiqau keŋesınıŋ töraǧasy Kemelbek Oişybaevtyŋ aituynşa, qazır telenaryqtaǧy jaŋa ürdısterdı aimaqtar qalyptastyryp otyr. Jas, tūraqty ärı belsendı körermen däl osy öŋırlerde ösıp keledı. Sondyqtan telearnalar arasyndaǧy bäseke de sol jaqqa oiysyp jatyr
Zertteu aumaǧynyŋ keŋeiuı bükıl media salasy üşın maŋyzdy. Būl telearnalardyŋ jūmysyn el kölemınde ädıl baǧalauǧa, öŋırlerdegı körermennıŋ şynaiy ädetın eskeruge jäne halyq sūranysyna sai mazmūn ūsynuǧa jol aşady.
