İranda soŋǧy üş jyldaǧy eŋ ırı ükımetke qarsy jappai narazylyqtar ekı aptadan berı jalǧasyp jatyr. İnternettıŋ öşırıluı men qataŋ qauıpsızdık şaralaryna qaramastan, senbı künı keşke Tegeran men özge de qalalarda tūrǧyndar qaitadan köşege şyqty. Būl turaly BBC jazdy, dep habarlaidy "Adyrna".
Narazylyqtar aiasynda İrannyŋ soŋǧy taqtan taidyrylǧan şahynyŋ ūly Reza Pehlevi şeruşılerdı qala ortalyqtaryn baqylauǧa alyp, narazylyqty jalǧastyruǧa şaqyrdy.
AQŞ-ta ornalasqan Human Rights Activist News Agency (HRANA) qūqyq qorǧau ūiymynyŋ mälımetınşe, narazylyqtar bastalǧaly berı şamamen 50 beibıt tūrǧyn men qauıpsızdık küşterınıŋ 15 qyzmetkerı qaza tapqan. Sondai-aq 2311-den astam adam qamauǧa alynǧan.
Norvegiiada tırkelgen Iran Human Rights (IHRNGO) ūiymy da kemınde 50 adamnyŋ köz jūmǧanyn rastady. Ūiym deregınşe, qaza tapqandardyŋ arasynda toǧyz bala bar.
İnternet şekteulerıne qaramastan, BBC qol jetkızgen beinejazbalarda İrannyŋ Joǧarǧy kösemı Aiatolla Ali Hameneige qarsy ūrandar aitylyp jatqanyn köruge bolady. Keibır şeruşıler Reza Pehlevidıŋ esımın atap, ony qoldaitynyn bıldırgen.
AQŞ-ta jürgen Pehlevi irandyqtardy demalys künderı narazylyqty jalǧastyruǧa şaqyryp, «ūlttyq revoliusiia jeŋıske jetken jaǧdaida» İranǧa oraluǧa daiyn ekenın mälımdedı.
İran bilıgı tärtıpsızdıkterdı AQŞ-tyŋ yqpalymen bailanystyryp otyr. Eldıŋ BŪŪ-daǧy tūraqty ökılı Qauıpsızdık keŋesıne joldaǧan hatynda Vaşingtondy İrannyŋ ışkı ısterıne aralasty dep aiyptady.
Mausym aiynda İrannyŋ iadrolyq nysandaryna soqqy jasalǧannan keiın, AQŞ prezidentı Donald Tramp eger ükımet narazylyq bıldıruşılerge qarsy küş qoldanudy jalǧastyrsa, jaŋa şabuyl jasaluy mümkın ekenın mälımdegen.
AQŞ Memlekettık hatşysy Marko Rubio X äleumettık jelısınde AQŞ İran halqyn qoldaitynyn jazdy.
Al BŪŪ Bas hatşysynyŋ ökılı Stefan Dujarrik adam ölımınıŋ artuyna alaŋdauşylyq bıldırıp, bilıktı beibıt şeruge şyǧu qūqyǧyn qamtamasyz etuge şaqyrdy.
İrandaǧy narazylyqtar 28 jeltoqsannan berı jalǧasyp keledı. Oǧan negızgı sebep — baǧanyŋ kürt ösuı men ūlttyq valiutanyŋ qūnsyzdanuy. Soŋǧy bır jylda AQŞ dollarynyŋ baǧamy şamamen 80 paiyzǧa ösken.
Bastapqyda ekonomikalyq sipatta bolǧan talaptar keiın saiasi ūrandarǧa ūlasyp, İslam Respublikasyn joiu jäne monarhiiany qalpyna keltıru jönındegı ündeuler paida boldy.
Prezident Masud Pezeşkian beibıt narazylyq bıldıruşılerge qarsy küş qoldanbau turaly tapsyrma bergenımen, keiınırek İrannyŋ Ūlttyq qauıpsızdık keŋesı şerulerge qarsy zaŋ aiasynda qataŋ şaralar qoldanylatynyn mälımdedı. Qūzyrly organdar narazylyq bıldıruşılerdı qauıpsızdıkke qater töndıruşıler dep atady.
Qazırgı uaqytta narazylyq aksiialary İrannyŋ 111 qala men eldı mekenın qamtyǧan.
