Belgılı zaŋger Aiman Umarova jaŋa Ata zaŋnyŋ jobasyndaǧy tıl men jer turaly baptarǧa pıkırın aityp, jelıdegı dürbeleŋ tuǧyzatyn habarlamalarǧa senbeuge şaqyrdy.
«Kei adamdar tek qana qazaq tılı – memlekettık tıl retınde jazyluy kerektıgın aityp jür. Ärine, ana tılımızdıŋ märtebesı joǧary, solai boluy da kerek. Bıraq būl jerde halyqaralyq konvensiialardy alatyn bolsaq, diskriminasiia degen mäsele bar. Qai jerge barsaŋ da, mysaly Amerikada ispan tılınde söileseŋız, olarǧa eşkım «ispanşa söilegenıŋız üşın jūmysqa almaimyz» demeidı. Tüsınesız be? Būl jerde kım qai tılde söilegısı keledı, sol tılde söileidı. Bıraq älbette, aǧylşyn tılın bılmegenderdıŋ özıne qiynyraq bolady», – dedı Aaiman Umarova Instagram jelısınde jaŋa Konstitusiiany talqylau jönındegı tıkelei transliasiiada.
Zaŋger öz elımızde de Keŋes zamanynda tuǧan, älı qazaqşa söilei almaityn azamattarymyz bar ekenın eske saldy.
«Eger qazır bız qazaq tılınde söilei almaityn qazaqtarǧa «endı bärı tek qazaqşa bolady» desek, olarǧa diskriminasiia bolady. Sony tüsınu kerek. Uaqyt ötedı, uaqyt ötken soŋ, kışkene de bolsa özgerıster ornai bastaidy. Däl qazır mūny jasau qiyn, sebebı diskriminasiia jasau – müldem dūrys emes», – deidı Aiman Umarova.
Sonymen bırge, spiker jaŋa Konstitusiiada jer turaly da eşbır özgerıs engızılmegenın aityp, qaueset sözderge senbeuge şaqyrdy.
«Jelıde köptegen qoldanuşy «jerımız satylatyn boldy» dep dürbeleŋ tuǧyzuda. Menıŋ aitarym – eşkımge senbeŋızder. Myna jerde men naqty qarap otyrmyn, jer turaly eşqandai özgerıs joq. Jer turaly özgerıs bolady degendı eşkımnen estıgen joqpyn. Qazırgı Konstitusiiada qalai jazylsa, tura solai qaldyrylǧan. Jer turaly eşkım eşnärse dep jatqan joq», – dep sözın tüiındedı Aiman Umarova.
