Bügın, 8 aqpanda saǧat 10:23 şamasynda Talǧar audanyna qarasty Besaǧaş auylyndaǧy «Burabai» kottedj qalaşyǧynda tau betkeiınen jer massasynyŋ jyljuy tırkeldı. Būl turaly äleumettık jelılerde video tarady, dep habarlaidy “Adyrna”.
Oqiǧaǧa keiıngı künderdegı tūraqsyz aua raiy men topyraqtyŋ şamadan tys ylǧaldanuy sebep bolǧan.
Almaty oblysy äkımdıgı oqiǧaǧa qatysty mälımdeme jasady.
Aqparatqa säikes, jyljyǧan topyraq Baianauyl köşesındegı №8 jäne №24a jeke tūrǧyn üilerdıŋ aumaǧyna tüsken. Jer massasy betonnan salynǧan tıreu qabyrǧadan asyp ötken.
“Baianauyl köşesı №8 mekenjaiynda kölemı 15×5 metr bolatyn bastyrma zaqymdanyp, HAVAL JOLION markaly jeŋıl avtokölıkke jäne bölek tūrǧan şaruaşylyq qūrylysynyŋ qabyrǧalaryna ziian kelgen. Būl aumaqta jyljyǧan topyraq kölemı şamamen 465 tekşe metr boldy. Al №24a üidıŋ aumaǧyna şamamen 5 tekşe metr topyraq tüsken, aitarlyqtai zaqymdanu tırkelmegen”, - delıngen habarlamada.
Zardap şekkender joq. Äkımdıktıŋ mälımetınşe, №8 üide üş adam, al Baianauyl köşesındegı №12 üide bes adam tūrady.
Būl aumaqtaǧy tūrǧyn üiler būryn tau betkeiın öz betınşe kesu arqyly salynǧan. Qazırgı uaqytta betkeidıŋ joǧarǧy bölıgındegı köşelerge kärız jelılerın tartu jobasy äzırlengen. Äkımdık aldaǧy biudjettık komissiia otyrysynda qūrylys-montaj jūmystaryn qarjylandyru jäne betkeidı nyǧaitu üşın sala mamandaryn tartu mäselesı qaralatynyn mälımdedı.
Qazır aumaqty topyraqtan tazalau jäne qalpyna keltıru jūmystary jürgızılıp jatyr.
