Jaınamazdy tepken bapkerdi oqýshylary ádeıi arandatqan eken

4109
Adyrna.kz Telegram

Tarazdaǵy jaınamazdy tepken bapker tóńiregindegi daý basylatyn emes. Búgin osy atyshýly vıdeonyń basty keıipkerleri: eki oqýshynyń ata-anasy bolǵan jaıdy balalary ádeıi uıymdastyrǵanyn aıtyp, musylman qaýymy men jattyqtyrýshydan keshirim suraǵan dep málimdedi KTK telearnasy. Sóıtip ózderi perzentterin óz erikterimen ınternattan shyǵaryp áketipti.

Vıdeokadardaǵy qos jasóspirimniń biri Shýdan, ekinshisi Qarataý qalasynan. Al ata-anasy uldarynyń namazǵa jyǵylǵanynan beıhabar. Sondyqtan jelige taraǵan vıdeony kórip ózderi de ań-tań. Sondaı-aq olar balalarynyń qýlyǵy úshin qatty qynjylatynyn jetkizip, musylman qaýymy men jattyqtyrýshydan keshirim suraǵan.

«Balalarynyń teris aǵymda oqyp jatqandyǵyn aıtty. Jáne  der kezinde jattyqtyrýshy kórip toqtatqany jáne vıdeo túsirilip jatqan kezde namaz ýaqytynyń bolmaǵandyǵyn úshtiń kezi ekenin moıyndap otyr», - deıdi Jambyl oblystyq mamandandyrylǵan sporttaǵy daryndy balalar mektep ınternaty dırektorynyń orynbasary Erdos Ákimov.

Onyń aıtýynsha, bir jyldan beri negizgi quramǵa ilige almaı júrgen qos shákirtke sońǵy synnan súrinse ınternattan shyǵý qaýipi tóngen. Buǵan bapkerdi aıyptaǵan jasóspirimder ony aıaqtan shalýdy muqııat uıymdastyrǵan. Ekeýi qyzý qandy jattyqtyrýshynyń teorııalyq sabaǵyna qatyspaı, onyń bólmege kelýin kútipti.

Almat Baetov jasóspirimderdiń adasyp júrgenderin áý basta baıqap, ózgelerdiń sanasyn ýlamaýdy eskertken eken. Biraq oǵan shákirtteri pysqyryp qaramaǵan. Aıta keteıik, jaınamazdy teýip, sájdege jyǵylǵan balalardy bólmeden jelkelep shyǵyrǵan bapkerdiń áreketi jurttyń ashýyn týǵyzǵan. Osy shýdan keıin jattyqtyrýshy jumystan qýylyp, ózi el aldyna shyǵyp keshirim suraǵan edi.

Fýtbolshylardy baptaǵan Almat Baetovpen qosa, oblystyq mamandandyrylǵan sporttaǵy daryndy balalar mektep ınternaty dırektorynyń tárbıe isi jónindegi orynbasary da qyzmetinen ketti. Al, jaınamaz tóńiregindegi daý munymen bitpeıtin tárizdi. Sebebi bolǵan jaıtqa qatysty arnaıy top qurylyp, tekserý júrip jatyr dep jazady Snkz.

Pikirler