Qazaqstandyq JASA TEAM komandasynyŋ müşelerı Omar Aserbekov pen Grigorii Şukin Alpıdegı eŋ kürdelı klassikalyq baǧyttardyŋ bırın baǧyndyrǧan alǧaşqy qazaqstandyqtar atandy. Olar Bern Alpılerındegı Eiger şyŋyna (3 970 m) Hekmaierdıŋ klassikalyq baǧyty arqyly köterıldı, dep habarlaidy «Adyrna» tılşısı Almaty qalasynyŋ äkımdıgıne sılteme jasap.
Būl älemdık alpinizmdegı eŋ äigılı ärı tehnikalyq jaǧynan kürdelı baǧyttardyŋ bırı. 1935 jyldan berı mūnda 60-tan astam adam qaza tapqan.
Şyŋǧa köterılu ekı jarym künge sozylǧan. Komanda mausymda alǧaş bolyp jolǧa şyqqandyqtan, būrynǧy alpinisterdıŋ ızı bolmaǧan, olar jol salyp, jartastardy qardan tazartyp otyrǧan. Bırınşı künı qabyrǧanyŋ üşten ekı bölıgın jürıp ötıp, «Ölım bivuagynda» şatyrsyz, saqtandyru nüktelerıne bailanǧan küide tünep şyqqan. Ekınşı künı eŋ kürdelı tehnikalyq joǧarǧy bölıktı eŋserıp, şyŋǧa jettı bırden tüsuge kırısken. Üşınşı künı aman-esen tömen tüsken.
Eiger Alpıdegı «alty ūly soltüstık qabyrǧanyŋ» qataryna kıredı. 2025 jyly Aserbekov pen Şukin Pti-Driu jäne Grand-Joras taularynyŋ soltüstık qabyrǧalaryn da baǧyndyrǧan bolatyn. Osylaişa olar bır mausymda baǧdarlamadaǧy eŋ kürdelı üş qabyrǧany eŋserıp, ärqaisysynda alǧaşqy qazaqstandyqtar atandy.
Baǧyt tolyq avtonomdy stilde, iaǧni gidsız, şerpasyz jäne aldyn ala daiyndyqsyz ötken.
Eiger atauy nemıs tılınen audarǧanda «adam jegış» degen maǧynany bıldıredı. Onyŋ soltüstık qabyrǧasynda 1935 jyldan berı kemınde 64 alpinist qaza tapqan. Osy sebeptı ol Mordwand — «qaterlı qabyrǧa» degen atauǧa ie bolǧan. HH ǧasyrdaǧy baspasözde būl baǧyt «Ölım qabyrǧasy» degen atpen keŋınen tanyldy. Hekmaier baǧyty (6A sanaty) jartasty jäne mūzdy relefte joǧary deŋgeidegı örmeleu şeberlıgın, şekteulı saqtandyru jaǧdaiynda qozǧalu täjıribesın jäne ülken fizikalyq tözımdılıktı talap etedı. Marşrut boiynda tık jartastar, mūz alaŋdary jäne qatqan mūz aralas kürdelı uchaskeler kezektesıp keledı. Biıktık aiyrmasy şamamen 1800 metr. Būl qabyrǧa tas qūlauy, qar köşkını jäne aua raiynyŋ kenet özgeruımen de qauıptı.
