Almaty polisiiasy Äl-Farabi daŋǧyly men Meŋdıqūlov köşesınıŋ qiylysynda bolǧan jantürşıgerlık jol apatyna qatysty mälımdeme jasady, dep habarlaidy "Adyrna" ūlttyq portaly.
Qaiǧyly oqiǧa saldarynan üş adam qaza tapqan. Polisiia mälımetınşe, apatqa qatysy bar Zeekr kölıgınıŋ jürgızuşısı qazırgı taŋda medisinalyq mekemede küzet baqylauynda em alyp jatyr. Onyŋ jaǧdaiy tūraqtalǧan soŋ, uaqytşa ūstau izoliatoryna jetkızılmek.
Atalǧan derek boiynşa Qazaqstan Respublikasy Qylmystyq kodeksınıŋ 345-baby, 4-bölıgımen qylmystyq ıs qozǧaldy. Būl bap eŋ qataŋ jaǧdaida 10 jylǧa deiın bas bostandyǧynan aiyru jazasyn qarastyrady.
Almaty qalalyq polisiia departamentı bastyǧynyŋ orynbasary Rüstem Şärıbaev oqiǧaǧa qatysy bar barlyq tūlǧalar anyqtalǧanyn mälımdedı.
«Oqiǧaǧa qatysqan jäne onyŋ qatysy bar barlyq tūlǧalar anyqtaldy. Ärqaisysyna äkımşılık ıs qozǧaldy, materialdar sotqa joldandy, kölıkter aiyp tūraǧyna qoiyldy. Eşkım jauapkerşılıkten qaşa almaidy», – dedı ol.
Polisiia qyzmetkerlerı barlyq beinebaqylau kameralarynyŋ jazbalaryn, sonyŋ ışınde jeke kameralardaǧy beinematerialdardy jinap, ıs materialdaryna tırkegen. Qazırgı uaqytta olar jan-jaqty zerttelıp jatyr.
