Balqaş qalasyna 89 jyl toldy. Merekelık kün ekologiialyq şaralarmen bastaldy. Taŋsärıden «Jastar» gülzarynda eresekter men balalar jinalyp, osynda qala künıne orai ūiymdastyrylǧan jäne «Taza Qazaqstan» baǧdarlamasy aiasynda jüzege asyrylyp jatqan «Balqaş — taza qala» aksiiasy bastau aldy.
Gülzar bır sätke ekologiialyq ideialardyŋ aşyq alaŋyna ainaldy. Şeberler qaita öŋdelgen materialdardan jasalǧan būiymdardyŋ körmesın ūsyndy. Qala tūrǧyndaryna resurstardy qaita öŋdeu men qaita paidalanu mümkındıkterı tanystyryldy.
Tūraqty damu jolyndaǧy zamanaui şeşımderdıŋ bırı retınde gidropondyq qondyrǧylar erekşe qyzyǧuşylyq tudyrdy.
«Tabiǧatty aiala» horeografiialyq qoiylymy men jas tabiǧat qorǧauşylardyŋ ügıt brigadasynyŋ öner körsetuı şaraǧa erekşe atmosfera syilady.
Balqaş qalasynyŋ äkımı Sapar Sataev tūrǧyndardy qūttyqtap, eŋ üzdık aula men käsıporyndy anyqtauǧa arnalǧan qalalyq baiqaularǧa bastau berdı.
Osy jerden «Balqaştyqtar taza qala üşın» atty auqymdy ekologiialyq şeru de jolǧa şyqty. Qalanyŋ ortalyq köşelerımen myŋdaǧan adam — oquşylar, studentter, eŋbek ūjymdary jäne beijai qaramaityn tūrǧyndar jürıp öttı. Bırneşe kvartalǧa sozylǧan kolonna taza qala — barşaǧa ortaq jauapkerşılık ekenın taǧy bır märte eske saldy.
Is-şara jalpyqalalyq senbılıkpen jalǧasty, ol «Dostyq» saiabaǧynda öttı. Mūnda da jüzdegen balqaştyq jinaldy. Qūral-saimandaryn qolǧa alǧan qatysuşylar alleialardy retke keltırıp, aumaqtardy qoqystan tazalap, bırge jaily qalalyq orta qalyptastyruǧa üles qosty.
Qoǧam belsendısı Anar Adambekova jerlesterıne ün qatyp, barşa tūrǧyndardy «Taza Qazaqstan» baǧdarlamasyna belsendı qatysuǧa şaqyrdy:
— Qalanyŋ tazalyǧy — barşamyzǧa ortaq jauapkerşılık. Är adam özınen bastauy tiıs: qoqys tastamau, özınen keiın jinau, tabiǧatqa jäne tuǧan qalasyna ūqypty qarau. Balqaşty bırge şyn mänınde taza, jaily ärı körıktı qalaǧa ainaldyraiyq — özımız üşın de, keleşek ūrpaq üşın de.
Aqsaqal Jūmabek İgembaev ta jastarǧa tuǧan jerge degen süiıspenşılıktı, eŋbekke qūrmettı jäne tazalyq mädenietın sıŋıru qajet ekenın atap öttı.
Bügın qoǧamdyq kölıkterde jäne adamdar köp jinalatyn oryndarda qalaǧa tanymal Balqaş jolbarysy maskotyn kezdestıruge bolady. Ol tūrǧyndarǧa paraqşalar taratyp, tazalyq ärkımnen bastalatynyn eske salady.
Merekelık baǧdarlama mūnymen aiaqtalǧan joq. Jaǧalauda jas suretşıler festivalı ötedı. M. Hamzin atyndaǧy mädeniet saraiynda «Kıtap oqityn ūlt» jobasynyŋ qalalyq kezeŋınıŋ qorytyndysy şyǧarylyp, eŋ köp kıtap oqyǧan tūrǧyndar marapattalady. Keşke balqaştyqtar men qala qonaqtary «Jastar» skverınde ötetın merekelık konsert pen jastar diskotekasyna şaqyrylady.
Balqaş qalasynyŋ tuǧan künı 11 säuırde atap ötıledı. Däl osy künı, 1937 jyly, Pribalhaşstroi jūmysşy kentı resmi türde Balqaş qalasyna ainaldy.
