AQŞ-tyŋ būrynǧy prezidentı Obama İzrail premer-ministrı Netaniiahu özın İranǧa qarsy soǧysqa itermelegenın mälımdedı, dep habarlaidy "Adyrna" ūlttyq portaly.
Būl turaly ol The New Yorker basylymyna bergen sūhbatynda aitqan.
BAQ taratqan aqparatta, Netaniiahu Obamaǧa aitylǧan uäjderdı AQŞ-tyŋ qazırgı prezidentı Donald Tramp aldynda da qoldanǧan. Eks-prezident İzrail basşysymen aradaǧy kelıspeuşılıkter būrynnan bar ekenın atap öttı.
Sūhbat barysynda Obama Tramptyŋ İranǧa qarsy soǧys bastau turaly şeşımıne de kümän keltırdı. Onyŋ aituynşa, būl qadam İzrail üşın de, AQŞ üşın de ūzaq merzımdı paida äkelmeuı mümkın.
«Menıŋ sol kezdegı baǧam dūrys boldy dep oilaimyn. Al qazır Netaniiahu maqsatyna jetken boluy mümkın, bıraq būl İzrail halqyna paidaly boldy ma — kümänım bar. AQŞ üşın de tiımdı boldy dep aita almaimyn», — dedı ol.
Obama sondai-aq Netaniiahumen aradaǧy saiasi qaişylyqtar būǧan deiın de keŋınen qūjattalǧanyn jetkızdı.
