Foto: kremlin.ru
Mäskeudegı Qyzyl alaŋda Ekınşı düniejüzılık soǧysyndaǧy Jeŋıstıŋ 81 jyldyǧyna arnalǧan äskeri parad öttı. Biylǧy ıs-şara şamamen 45 minutqa ǧana sozyldy, dep habarlaidy "Adyrna" portaly "Azattyq radiosyna" sıltep.
Būl joly parad alǧaş ret köp jyldan berı äskeri tehnikanyŋ qatysuynsyz öttı. Kreml būl şeşımdı «jedel jaǧdaiǧa» bailanysty dep tüsındırdı. Degenmen, äue tehnikasynyŋ körsetılımı saqtaldy.
Resei Qorǧanys ministrlıgınıŋ mälımetınşe, jaiau kolonna qūramynda barlyq türdegı joǧary äskeri oqu oryndarynyŋ kursanttary, sondai-aq Ukrainadaǧy soǧysqa qatysqan äskeri qyzmetşıler bolǧan. Teletransliasiia barysynda diktor şaraǧa Soltüstık Koreia äskeri qyzmetşılerınıŋ de qatysqanyn habarlady.
Resei prezidentı Vladimir Putin saltanatty söz söilep, Ūly Otan soǧysynda qaza tapqandardy eske alyp, bır minut ünsızdık jariialady.
Paradqa Belarus, Qazaqstan, Özbekstan, Malaiziia jäne Laos elderınıŋ basşylary qatysty. Sondai-aq Resei moiyndaǧan, bıraq halyqaralyq qauymdastyq moiyndamaityn Oŋtüstık Osetiia men Abhaziia basşylary da kelgen. Al Slovakiia premer-ministrı Robert Fiso Mäskeuge kelgenımen, paradqa qatyspaǧan.
Der Spiegel basylymy Resei bilıgı Qyzyl alaŋdaǧy paradqa qatysuy tiıs şeteldık jurnalisterdıŋ akkreditasiiasyn qaitaryp alǧanyn habarlaǧan. Kremldıŋ baspasöz hatşysy Dmitrii Peskov būl aqparatty joqqa şyǧaryp, «Der Spiegel dūrys emes mälımet taratty» dedı. Degenmen, ol jurnalister sanynyŋ şektelgenın rastady.
Biyl Jeŋıstıŋ 81 jyldyǧy atalyp ötude. Ötken jyly, mereitoilyq paradqa 10 myŋnan astam äskeri qyzmetşı, sonyŋ ışınde Ukrainadaǧy soǧysqa qatysqandar da bolǧan edı.
Resei 8–9 mamyr künderıne bırjaqty türde uaqytşa bıtım jariialaǧan edı. Alaida Mäskeu būl bıtım būzylǧan jaǧdaida Kiev ortalyǧyna soqqy beru mümkın ekenın eskertken. Ukraina prezidentı Vladimir Zelenskii 6 mamyrdan bastap atysty toqtatudy ūsynǧanymen, Resei būǧan kelıspei, şabuyldardy jalǧastyrǧan.
8 mamyr tünınde Resei öŋırlerı de auqymdy şabuyldarǧa ūşyraǧany habarlandy.
AQŞ prezidentı Donald Tramp Resei men Ukraina arasynda üş kündık bıtım turaly kelısım jasalǧanyn mälımdedı. Keiın Kiev pen Mäskeu būl kelısımdı rastaǧan. Sonymen qatar taraptar 1000-ǧa 1000 formulasy boiynşa auqymdy äskeri tūtqyndar almasuyn jüzege asyruǧa uaǧdalasqan. Tramp būl qadamdy «ūzaqqa sozylǧan, qandy ärı auyr soǧystyŋ aiaqtaluynyŋ bastamasy boluy mümkın» dep baǧalap, Resei prezidentı Vladimir Putin men Ukraina prezidentı Vladimir Zelenskiige bastamany qoldaǧany üşın alǧys bıldırdı. Zelenskii üş kündık bıtımdı jäne tūtqyn almasu kelısımın rastady. Onyŋ aituynşa, Ukraina üşın basty gumanitarlyq mäsele – äskeri tūtqyndardy elge qaitaru. «Qyzyl alaŋ bız üşın tūtqynǧa tüsken ukrain azamattarynyŋ ömırınen maŋyzdy emes», – degen Ukraina prezidentı 9 mamyrda Mäskeu qalasynda parad ötkızuge «rūqsat beretın» jarlyqqa qol qoiǧany BAQ-ta bıraz dau tudyrǧany belgılı.
