Timur Qūlybaevtyŋ Halyk qaiyrymdylyq qory jüzege asyryp jatqan Auyl Sport jobasynyŋ jeŋımpazy Nazerke Bolatbek halyqaralyq arenada Qazaqstannyŋ mereiın üstem ettı. Jas sportşy Taşkent qalasynda üstel tennisınen ötken WTT Youth Contender Tashkent 2026 halyqaralyq turnirınde kümıs jüldeger atandy.
Türkıstan oblysy Jetısai audanyna qarasty Asyqata auylynan şyqqan Nazerke 11 jasqa deiıngı qyzdar arasynda öner körsetıp, älemnıŋ är elınen kelgen qarsylastarymen tartysty oiyn ötkızdı. Nätijesınde Qazaqstan qorjynyna kümıs medal saldy.
13-16 mamyr aralyǧynda Özbekstan astanasyndaǧy «Yunusobod» sport keşenınde ūiymdastyrylǧan bedeldı halyqaralyq dodaǧa 500-ge juyq sportşy qatysty. Turnirde Qazaqstan, Özbekstan, Qytai, Oŋtüstık Koreia, Ündıstan, Türkiia, Saud Arabiiasy, Gonkong jäne basqa da memleketterdıŋ jas tennisşılerı baq synady.
Qazaqstan qūramasy sapynda būl jarysqa Auyl Sport 2025 respublikalyq turnirınıŋ jeŋımpazdary atanǧan Türkıstan oblysynyŋ tört jas sportşysy qatysty. Qatysuşylardyŋ jol jüru, jatyn oryn, tamaqtanu jäne turnirge qatysu şyǧyndaryn Halyk qaiyrymdylyq qory tolyqtai öz moinyna aldy.
«Būl jarys maǧan ülken täjıribe syilady. Älemnıŋ är tükpırınen kelgen myqty sportşylarmen oinau oŋai bolǧan joq. Bıraq auyldan şyqqan balalardyŋ da halyqaralyq deŋgeide jeŋıske jete alatynyn däleldegım keldı. Auyl Sport jobasyna, bapkerlerıme jäne ata-anama alǧys aitamyn», – dedı Nazerke Bolatbek.
Aita keteiık, Halyk qaiyrymdylyq qory Türkıstan öŋırınde auyl sportyn damytumen qatar, äleumettık jäne mädeni jobalardy da jüielı türde jüzege asyryp keledı. Qor jaqynda Türkıstan oblysyndaǧy tarihi-mädeni mūra nysandarynyŋ bırı - Baba Tüktı Şaşty Äziz kesenesın tolyq qaita jaŋǧyrtu jobasyn bastady. Jobanyŋ jalpy qūny 200 million teŋgeden asady, qūrylys jūmystary alty ai ışınde aiaqtalady dep josparlanǧan.
Nazerkenıŋ jetıstıgı auyl sportyna körsetılıp jatqan qoldaudyŋ naqty nätijesı. Mūndai bastamalar şalǧai auyldaǧy talantty balalarǧa ülken sportqa jol aşyp, halyqaralyq arenada el namysyn qorǧauǧa mümkındık beredı.
