Qazaqstandyq tanymal MMA jauyngerlerınıŋ bırı Quat Hamitov aiyppūl töledı, dep habarlaidy "Adyrna" ūlttyq portaly Tengri Sport-qa sıltep.
Äleumettık jelıde Atyraudaǧy jekpe-jek keşın ūiymdastyruşylar Quat Hamitovtyŋ qyzyl kabriolettı tızgındep kele jatqan videosyn jariialaǧan. Beinede sportşynyŋ qauıpsızdık beldıgın taqpaǧany tüsırılgen. Keiın Atyrau polisiiasy atalǧan videoǧa bailanysty tekseru jürgızıp, qatysuşylardy jauapkerşılıkke tartty.
«Atyrau oblystyq polisiia departamentı äleumettık jelılerde jol qozǧalysy erejelerın öreskel būzu deregı beinelengen video taralǧanyn habarlaidy. Tekseru nätijesınde Toyota Camry kölıgındegı 24 jäne 22 jastaǧy jolauşylar qozǧalys kezınde qauıpsızdık beldıgın taqpaǧany jäne kölık salonynan denesın şyǧarǧany anyqtaldy. Atalǧan qūqyqbūzuşylyqtar üşın olar äkımşılık jauapkerşılıkke tartyldy. Sonymen qatar būl zaŋbūzuşylyqtarǧa jol bergen 20 jastaǧy jürgızuşı de jauapqa tartyldy. Al Mustang kölıgınıŋ 38 jastaǧy jürgızuşısı qauıpsızdık beldıgın taqpai kölık basqarǧany üşın äkımşılık jauapkerşılıkke tartyldy», — dep mälımdedı polisiia.
Sportşy Hamitov äreketınıŋ eşkımge qauıp töndırmegenın aitty.
«Hattama toltyryp, aiyppūl saldy. Būl jekpe-jek jarnamasyn tüsıru kezındegı jūmys sätterı edı. Beldık roliktegı qozǧalysyma kedergı keltırdı. Onyŋ üstıne bız saǧatyna 30 şaqyrym jyldamdyqpen ǧana kele jattyq, ömırımızge qauıp bolǧan joq. Sondyqtan beldıktı 10 sekundqa şeşıp tastadyq. Zaŋ bärıne ortaq, sondyqtan būl — ädıl jaza dep oilaimyn. Jalpy zaŋ būzǧandy ūnatpaimyn, tek tüsırılım bolǧan soŋ osylai şyqty», — dedı Quat tılşıge bergen sūhbatynda.
