9 mausymda AQŞ Qaruly küşterı Apache tıkūşaǧy atyp tüsırılgennen keiın İran aumaǧyndaǧy nysandarǧa soqqy jasady, dep habarlaidy «Adyrna» tılşısı.
«Būl operasiia – İrannyŋ negızsız agressiiasyna berılgen laiyqty jauap», – dep mälımdedı AQŞ Qaruly küşterınıŋ Ortalyq qolbasşylyǧy H äleumettık jelısınde.
AQŞ prezidentı Donald Tramp ABC News telearnasyna bergen sūhbatynda būl ärekettı qajettı qadam dep baǧalady.
«Jauap öte qataŋ ärı quatty boluy kerek edı. Qazır däl sondai jauap berılıp jatyr», – dedı ol.
Axios basylymynyŋ mälımetınşe, amerikalyq küşter Ormūz būǧazy maŋyndaǧy bırneşe irandyq äue qorǧanysy jüiesı men radiolokasiialyq stansiialardy nysanaǧa alǧan. İrandyq būqaralyq aqparat qūraldary eldıŋ oŋtüstık jaǧalauynda, Ormūz būǧazy maŋynda jarylystar bolǧanyn habarlady.
Tasnim agenttıgınıŋ deregınşe, jarylystar Sirik jäne Minab qalalarynda, sondai-aq Keşm aralynda estılgen.
İrannyŋ syrtqy ıster ministrı Abbas Aragchi Vaşingtonǧa jauap qaitarylatynyn mälımdedı.
«Ūrys alaŋyndaǧy sätsızdıkterıne qaramastan, AQŞ bızdıŋ tabandylyǧymyzdy synap köruge şeşım qabyldady. Qaruly küşterımız eşbır şabuyl men qoqan-loqyny jauapsyz qaldyrmaidy. Eger qauıpsızdıkte bolǧylaryŋyz kelse, aimaǧymyzdan ketıŋızder», – dep jazdy ol H äleumettık jelısınde.
Keiınırek Tasnim agenttıgı İslam revoliusiiasy saqşylary korpusynyŋ mälımdemesın jariialap, İrannyŋ aimaqtaǧy AQŞ nysandaryna zymyrandar men ūşqyşsyz ūşu apparattaryn jıbergenın habarlady.
Bırneşe saǧattan soŋ CENTCOM operasiianyŋ aiaqtalǧanyn mälımdep, amerikalyq äskerilerdıŋ Ormūz būǧazy maŋyndaǧy äue qorǧanysy obektılerıne, jerüstı basqaru beketterıne jäne radiolokasiialyq stansiialarǧa soqqy bergenın rastady.
Būǧan deiın Donald Tramp özınıŋ Truth Social äleumettık jelısınde Apache tıkūşaǧynyŋ qūlauyna bailanysty İranǧa qarsy jauap şaralary qabyldanatynyn eskertken bolatyn. Onyŋ aituynşa, tıkūşaq Ormūz būǧazynda patruldeu kezınde irandyq äskeri küşterdıŋ äreketınen apatqa ūşyraǧan. Ekı ūşqyş ta qūtqarylǧan.
Associated Press agenttıgıne aty-jönın atamau şartymen pıkır bıldırgen amerikalyq şeneunıktıŋ sözınşe, tıkūşaq irandyq dronmen soqtyǧysqannan keiın qūlaǧan. Alaida būl soqtyǧysudyŋ qasaqana jasalǧan-jasalmaǧany äzırge belgısız. Resmi mälımdemelerde būl nūsqa aitylmaidy.
Soŋǧy bırneşe künde AQŞ pen İzraildıŋ İranǧa qarsy äskeri ıs-qimyldaryna bailanysty öŋırdegı jaǧdai bırneşe ret şielenıse tüstı. 7 mausymda İran säuır aiynyŋ basynan berı alǧaş ret İzrailge zymyrandar ūşyrdy. İRSK mūny İzraildıŋ Beirut qalasyndaǧy «Hezbolla» qozǧalysyna jaqyn audandarǧa jasaǧan äue şabuyldaryna jauap dep tüsındırdı. Būǧan jauap retınde İzrail de İran aumaǧyndaǧy nysandarǧa soqqylaryn qaita bastady. Al 8 mausymda İzrail men İran uaqytşa bıtım jariialaǧan bolatyn.
İranǧa qarsy jauap şaralary turaly mälımdeme jasardan bırneşe saǧat būryn Donald Tramp Tegeranmen beibıt kelısımge qol jetkızu mümkındıgı joǧary ekenın aitqan edı.
«Bız öte jaqsy kelısımge alyp keletın üderıstıŋ soŋǧy kezeŋıne jettık», – dedı AQŞ prezidentı.
Onyŋ sözınşe, İranmen kelıssözder aldaǧy ekı-üş kün ışınde aiaqtaluy mümkın.
