Almaty äkımı Darhan Satybaldy men «Otbasy bank» AQ basqarma töraiymy Läzzat İbragimova tūrǧyn üi jaǧdaiyn jaqsartuǧa mūqtaj otbasylarǧa jaŋa päterlerdıŋ kıltın tabystau räsımıne qatysty. Baǧdarlamanyŋ alǧaşqy kezeŋı aiasynda kommunaldyq tūrǧyn üi qorynan 885 otbasy baspanamen qamtamasyz etıledı.
Jaŋa qonys ielerın qūttyqtaǧan Darhan Satybaldy azamattardy qoljetımdı tūrǧyn üimen qamtamasyz etu memlekettık äleumettık saiasattyŋ basym baǧyttarynyŋ bırı ekenın atap öttı.
«Memleket basşysy Qasym-Jomart Kemelūly Toqaevtyŋ tapsyrmasyna säikes, halyqtyŋ äl-auqatyn arttyru – memlekettık saiasattyŋ negızgı basymdyqtarynyŋ bırı. Äsırese, memlekettıŋ qoldauyna şyn mänınde mūqtaj azamattardy tūrǧyn üimen qamtamasyz etuge erekşe köŋıl bölınedı. Biyl Almatyda tūrǧyn üige mūqtaj 11 myŋnan astam azamattyŋ baspana jaǧdaiyn jaqsartu josparlanyp otyr», – dedı şahar basşysy.
Onyŋ aituynşa, bügıngı kezeŋ almatylyqtardy tūrǧyn üimen qamtamasyz etu jönındegı auqymdy jūmystyŋ bastamasy boldy. Alǧaşqy kezeŋde 885 päter berılse, ekınşı kezeŋde – 1832, üşınşı kezeŋde – 670, al törtınşı kezeŋde 6161 päterdı tabystau josparlanǧan. Osylaişa, jyl soŋyna deiın myŋdaǧan almatylyq otbasy baspana mäselesın şeşuge mümkındık alady.
Jalpy, 2026 jyly 8250 azamat jaldamaly tūrǧyn üimen qamtamasyz etıledı. Sonymen qatar, 1298 adam jeŋıldetılgen nesie baǧdarlamalary arqyly baspana satyp alsa, kemınde 1650 jas maman «Almaty jastary» baǧdarlamasy aiasynda jeke baspanasynyŋ iesı atanady.
Būdan bölek, qalada memlekettık qoldaudyŋ qosymşa tetıkterı de jalǧasady. Äleumettık osal sanattaǧy azamattarǧa ipotekalyq nesie räsımdeu kezınde bastapqy jarnanyŋ bır bölıgın öteuge arnalǧan tūrǧyn üi sertifikattary berıledı. Biyl osyndai 200 sertifikat tabystau josparlanǧan.
Sondai-aq, jaldamaly tūrǧyn üide tūratyn azamattarǧa jaldau aqysynyŋ bır bölıgın subsidiialau tetıgı de saqtalady. Būl şara tūrǧyn üige mūqtaj otbasylardyŋ qarjylyq jüktemesın azaityp, baspananyŋ qoljetımdılıgın arttyruǧa mümkındık beredı.
