الماتى اكىمى دارحان ساتىبالدى مەن «وتباسى بانك» اق باسقارما ءتورايىمى ءلاززات يبراگيموۆا تۇرعىن ءۇي جاعدايىن جاقسارتۋعا مۇقتاج وتباسىلارعا جاڭا پاتەرلەردىڭ كىلتىن تابىستاۋ راسىمىنە قاتىستى. باعدارلامانىڭ العاشقى كەزەڭى اياسىندا كوممۋنالدىق تۇرعىن ءۇي قورىنان 885 وتباسى باسپانامەن قامتاماسىز ەتىلەدى.
جاڭا قونىس يەلەرىن قۇتتىقتاعان دارحان ساتىبالدى ازاماتتاردى قولجەتىمدى تۇرعىن ۇيمەن قامتاماسىز ەتۋ مەملەكەتتىك الەۋمەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى.
«مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس، حالىقتىڭ ءال-اۋقاتىن ارتتىرۋ – مەملەكەتتىك ساياساتتىڭ نەگىزگى باسىمدىقتارىنىڭ ءبىرى. اسىرەسە، مەملەكەتتىڭ قولداۋىنا شىن مانىندە مۇقتاج ازاماتتاردى تۇرعىن ۇيمەن قامتاماسىز ەتۋگە ەرەكشە كوڭىل بولىنەدى. بيىل الماتىدا تۇرعىن ۇيگە مۇقتاج 11 مىڭنان استام ازاماتتىڭ باسپانا جاعدايىن جاقسارتۋ جوسپارلانىپ وتىر»، – دەدى شاھار باسشىسى.
ونىڭ ايتۋىنشا، بۇگىنگى كەزەڭ الماتىلىقتاردى تۇرعىن ۇيمەن قامتاماسىز ەتۋ جونىندەگى اۋقىمدى جۇمىستىڭ باستاماسى بولدى. العاشقى كەزەڭدە 885 پاتەر بەرىلسە، ەكىنشى كەزەڭدە – 1832, ءۇشىنشى كەزەڭدە – 670, ال ءتورتىنشى كەزەڭدە 6161 پاتەردى تابىستاۋ جوسپارلانعان. وسىلايشا، جىل سوڭىنا دەيىن مىڭداعان الماتىلىق وتباسى باسپانا ماسەلەسىن شەشۋگە مۇمكىندىك الادى.
جالپى، 2026 جىلى 8250 ازامات جالدامالى تۇرعىن ۇيمەن قامتاماسىز ەتىلەدى. سونىمەن قاتار، 1298 ادام جەڭىلدەتىلگەن نەسيە باعدارلامالارى ارقىلى باسپانا ساتىپ السا، كەمىندە 1650 جاس مامان «الماتى جاستارى» باعدارلاماسى اياسىندا جەكە باسپاناسىنىڭ يەسى اتانادى.
بۇدان بولەك، قالادا مەملەكەتتىك قولداۋدىڭ قوسىمشا تەتىكتەرى دە جالعاسادى. الەۋمەتتىك وسال ساناتتاعى ازاماتتارعا يپوتەكالىق نەسيە راسىمدەۋ كەزىندە باستاپقى جارنانىڭ ءبىر بولىگىن وتەۋگە ارنالعان تۇرعىن ءۇي سەرتيفيكاتتارى بەرىلەدى. بيىل وسىنداي 200 سەرتيفيكات تابىستاۋ جوسپارلانعان.
سونداي-اق، جالدامالى تۇرعىن ۇيدە تۇراتىن ازاماتتارعا جالداۋ اقىسىنىڭ ءبىر بولىگىن سۋبسيديالاۋ تەتىگى دە ساقتالادى. بۇل شارا تۇرعىن ۇيگە مۇقتاج وتباسىلاردىڭ قارجىلىق جۇكتەمەسىن ازايتىپ، باسپانانىڭ قولجەتىمدىلىگىن ارتتىرۋعا مۇمكىندىك بەرەدى.
