Atyrau oblysynda pasientterden tegın körsetıluı tiıs medisinalyq qyzmet üşın zaŋsyz aqy alǧan hirurg-därıgerge qatysty qylmystyq ıs sotqa joldandy, dep habarlaidy “Adyrna”.
Qarjylyq monitoring agenttıgınıŋ mälımetınşe, därıger 2023–2025 jyldar aralyǧynda «Family Health Clinic» jäne «Kim V.» klinikalarynda eŋbek etıp, varikoz auruyna operasiia jasaǧan. Alaida ol būl qyzmetterdıŋ Mındettı äleumettık medisinalyq saqtandyru (MÄMS) aiasynda tegın körsetıletının emdeluşılerden jasyrǧan.
Tergeu barysynda anyqtalǧandai, därıger bır medisinalyq qyzmet üşın ekı ret tabys tapqan. Tegın jasaluy tiıs operasiiadan beihabar bolǧan 42 pasient onyŋ jeke bank şotyna jalpy somasy 8 million teŋgeden astam qarajat audarǧan.
Sonymen qatar, «DamuMed» aqparattyq jüiesıne operasiialar MÄMS aiasynda tegın körsetıldı degen jalǧan mälımet engızılgen. Sonyŋ negızınde Äleumettık medisinalyq saqtandyru qory atalǧan klinikalarǧa 14,8 million teŋgeden astam qarjy audarǧan.
Būǧan qosa, hirurg qyzmettık mındetın oryndaǧany üşın nauqastardan zaŋsyz aqşalai syiaqy alyp otyrǧany anyqtaldy.
Qazırgı uaqytta sotqa deiıngı tergeu aiaqtalyp, qylmystyq ıs sottyŋ qarauyna jıberıldı. Küdıktıge qatysty «elden ketpeu turaly qolhat» türındegı būltartpau şarasy qoldanylǧan.
