Ä. Qasteev atyndaǧy Qazaqstan Respublikasynyŋ Ūlttyq öner muzeiınde jaŋǧyrtylǧan «Art-zerthana» muzeilık körkemsuret studiiasy tanystyryldy. Mūnda jyl saiyn 3 myŋǧa juyq bala men eresek şyǧarmaşylyqpen ainalysa alady.
Is-şaraǧa QR Premer-ministrınıŋ orynbasary – Mädeniet jäne aqparat ministrı Aida Balaeva, «Samūryq-Qazyna» AQ basqarma töraǧasy Nūrlan Jaqypov, Ä. Qasteev atyndaǧy QR Ūlttyq öner muzeiınıŋ direktory Gülaiym Jūmabekova, elımızdıŋ mädeniet jäne öner qairatkerlerı, şeberler men muzeilık körkemsuret studiiasynyŋ şäkırtterı qatysty.
«Art-zerthana» – muzei pedagogikasy aiasynda 2007 jyldan berı jüzege asyrylyp kele jatqan Ūlttyq öner muzeiınıŋ şyǧarmaşylyq-bılım beru jobasy. Onyŋ basty maqsaty – balalardyŋ, jasöspırımderdıŋ, jastar men eresekterdıŋ beineleu önerıne qyzyǧuşylyǧyn arttyryp, şyǧarmaşylyq äleuetın aşu.
Käsıbi suretşı-pedagogterdıŋ jetekşılıgımen akademiialyq suret, keskındeme, kompozisiia, grafika, sändık-qoldanbaly öner jäne şyǧarmaşylyq ızdenıstıŋ türlı baǧyttary boiynşa sabaqtar ötkızıledı. Joba jüzege asyrylǧan uaqyttan berı studiiada 10 myŋnan astam bala men jasöspırım bılım aldy.
Sonymen qatar studiia erekşe bılım beru qajettılıkterı bar balalarǧa arnalǧan şyǧarmaşylyq baǧdarlamalardy jüielı türde jüzege asyryp, inkliuzivtı muzeilık bılım beru qaǧidattaryn damytuǧa üles qosyp keledı.
Jaŋǧyrtylǧan jobanyŋ tanystyrylymynda Aida Balaeva önerdı damytuǧa memlekettık qoldau körsetu, jastardy şyǧarmaşylyqqa baulu jäne olardyŋ qabıletın aşuǧa qolaily jaǧdai jasau mädeniet saiasatynyŋ maŋyzdy basymdyqtarynyŋ bırı ekenın atap öttı.
«Memleket basşysy mädeniet salasyna airyqşa köŋıl bölıp keledı. Salany qoldauǧa baǧyttalǧan jüielı memlekettık saiasattyŋ arqasynda bügınde naqty nätijelerge qol jetkızdık. 2025 jyly Qazaqstan Respublikasynyŋ Ortalyq memlekettık muzeiı men Äbılhan Qasteev atyndaǧy Memlekettık öner muzeiıne, al 2026 jyly Ūlttyq muzeige «Ūlttyq» märtebesı berıldı. Sonymen qatar Prezidenttıŋ tapsyrmasy boiynşa byltyr «Samūryq-Qazyna» qory Qasteev muzeiınde auqymdy jöndeu jūmystaryn jürgızdı. «Qazaqstannyŋ eŋbek sıŋırgen suretşısı» qūrmettı ataǧynyŋ taǧaiyndaluy da maŋyzdy şeşımnıŋ bırı boldy. Būl otandyq beineleu önerınıŋ qoǧamdaǧy ornyna berılgen joǧary baǧa ärı öz ısıne adaldyqpen qyzmet etıp kele jatqan suretşılerdıŋ köpjyldyq eŋbegıne körsetılgen laiyqty qūrmet. Osy mümkındıktı paidalana otyryp, mädeniet salasynyŋ barşa ökılderınıŋ jäne jeke özımnıŋ atymnan Memleket basşysyna salaǧa körsetıp kele jatqan tūraqty qoldauy üşın şynaiy rizaşylyǧymdy bıldıremın», – dedı Premer-ministrdıŋ orynbasary.
«Samūryq-Qazyna» qorynyŋ qoldauymen jüzege asyrylǧan joba aiasynda muzeidıŋ şyǧarmaşylyq keŋıstıgı jaŋǧyrtyldy. Aumaǧy 110 şarşy metrden asatyn zerthana keskındeme, grafika jäne sändık-qoldanbaly öner sabaqtaryn ötkızuge arnalǧan zamanaui qūral-jabdyqtarmen qamtamasyz etıldı. Sonymen qatar studiiada şyǧarmaşylyq jūmystardy tanystyruǧa arnalǧan, zamanaui fotoapparaturamen jabdyqtalǧan arnaiy fotokeŋıstık qūryldy. Būl şäkırtterge öz tuyndylaryn käsıbi deŋgeide tanystyryp, şyǧarmaşylyq jetıstıkterın sifrlyq keŋıstıkte keŋınen körsetuge mümkındık beredı. Mūnda 5 pen 17 jas aralyǧyndaǧy balalar men jasöspırımderge arnalǧan şeberlık sabaqtary, şyǧarmaşylyq praktikumdar jäne tabiǧat aiasyndaǧy suret salu sabaqtary ötkızıledı.
«Art-zerthana» jas daryndar bas qosatyn şyǧarmaşylyq ortaǧa ainalyp, olardyŋ damuyna jäne tyŋ ızdenısterıne jaŋa mümkındıkter beredı dep senemın. «Samūryq-Qazyna» üşın mädeniettı qoldau – ūlttyq mūramyzdy saqtauǧa jäne zamanaui mädeni ortany damytuǧa qosylǧan üles», – dedı Nūrlan Jaqypov.
Aita keteiık, studiia şyǧarmaşylyq qabıletı joǧary balalar men jastardy qoldauǧa, olardyŋ bolaşaq mamandyǧyn dūrys taŋdauyna erekşe köŋıl böledı. Daryndy şäkırtterdı joǧary jäne orta arnauly körkemöner oqu oryndaryna tüsuge daiarlap, şyǧarmaşylyq äleuetınıŋ damuyna jäne bolaşaq suretşı retınde qalyptasuyna yqpal etedı.
Is-şara aiasynda qonaqtarǧa muzeidıŋ sifrlyq portaly da tanystyryldy. Jaŋǧyrtylǧan portaldyŋ qoldanysy barynşa yŋǧaily ärı inkliuzivtı bola tüstı. Endı keluşıler muzei kolleksiiasy men körmelerın onlain tamaşalai alady. Al 3D-tur kez kelgen jerden muzei keŋıstıgıne virtualdy saiahat jasap, ekspozisiialarmen tanysuǧa mümkındık beredı.
