Foto: Qorǧanys ministrlıgı
Qazaqstannyŋ Qorǧanys ministrı Däuren Qosanov qyzmetınen bosatyldy. Tiıstı Jarlyqqa 27 qyrküiekte Prezident Qasym-Jomart Toqaev qol qoidy, dep habarlaidy “Adyrna”.
“Memleket basşysynyŋ Jarlyǧymen Däuren Jūmataiūly Qosanov Qazaqstan Respublikasynyŋ Qorǧanys ministrı lauazymynan bosatyldy”, delıngen habarlamada.
Däuren Qosanov 1969 jyly Pavlodar oblysynda düniege kelgen. Armavir joǧary äskeri aviasiialyq ūşqyştar uchilişesın, Iý.A. Gagarin atyndaǧy Äskeri-äue akademiiasyn jäne Resei Federasiiasy Qaruly küşterı Bas ştabynyŋ Äskeri akademiiasyn tämämdaǧan.
Äskeri qyzmetın Üşaraldaǧy joiǧyş aviasiia polkınde ūşqyş-istrebitel bolyp bastap, är jyldary Taldyqorǧan jäne Şymkent qalalaryndaǧy aviabazalardy basqarǧan, Äskeri-äue küşterın jäne Äue qorǧanysy küşterınıŋ Äskeri institutyn basqarǧan.
2022-2024 jyldary Qazaqstan Qaruly küşterı Äue qorǧanysy küşterınıŋ bas qolbasşysy bolyp, 2024-2025 jyldary Qorǧanys ministrınıŋ orynbasary - Äue qorǧanysy küşterınıŋ bas qolbasşysy qyzmetın atqardy.
Qosanov alǧaş ret 2025 jyly Qazaqstannyŋ Qorǧanys ministrı bolyp taǧaiyndalǧan bolatyn.
Eske salaiyq, 24 qyrküiekte Maŋǧystau oblysynda Qazaqstan Qaruly küşterı Äskeri-teŋız küşterınıŋ "Hazar qorǧany - 2026" oqu-jattyǧuy kezınde 17 äskeri qyzmetşını teŋız aǧyzyp äketken. Olar Kaspii jaǧalauynda oqu-jauyngerlık tapsyrma oryndap jatqanda aua raiy kürt naşarlap, jel küşeigen.
Qorǧanys ministrlıgınıŋ mälımetınşe, 14 äskeri qyzmetşı qaza tauyp, üşeuı qūtqaryldy.
Qaiǧyly oqiǧadan keiın 25 qyrküiek Qazaqstanda jalpyūlttyq aza tūtu künı bolyp jariialandy.
Oqiǧaǧa bailanysty qylmystyq ıs qozǧalyp, tergeu amaldary jürgızılıp jatyr. Qylmystyq ıs qyzmetke salǧyrt qarau jäne korabl jürgızu qaǧidalaryn būzu faktılerı boiynşa tergelude.
Tergeu aiasynda Qazaqstan Respublikasy Qaruly Küşterınıŋ joǧary jäne aǧa komandalyq qūramyndaǧy jauapty lauazymdy tūlǧalar ūstaldy. Olar auyr zardaptarǧa äkep soqqan qylmystyq qūqyq būzuşylyqtar jasady degen küdıkke ılındı.
Ol alǧaş ministr bolyp 2025 jyly mausymda taǧaiyndalǧan. Al jaŋa Konstitusiiadan keiın qaita taǧaiyndalǧanyna 1 ai tolǧan joq.
