Prezident Qasym-Jomart Toqaev qorǧanys vedomstvosynyŋ basşylyq qūramymen ötken keŋeste äskerdı reformalau keregın aitty, dep habarlaidy "Adyrna".
Jiyn Maŋǧystau oblysynda ötken oqu-jattyǧu kezınde qaza tapqan 14 äskeri qyzmetşını bır minut ünsızdıkpen eske aludan bastaldy. Memleket basşysy bolǧan oqiǧaǧa qataŋ baǧa berdı.
"Men qaza bolǧan ärbır äskeri qyzmetşınıŋ ata-anasyna köŋıl aityp, arnaiy jedelhatymdy joldadym. Qaitys bolǧan azamattardyŋ otbasylaryna barlyq qajettı kömek körsetıledı. Olardyŋ eşqaisysy qoldausyz, kömeksız qalmaidy", – dedı Qasym-Jomart Toqaev.
Qasym-Jomart Toqaev qaiǧyly oqiǧanyŋ män-jaiyn ǧana emes, mūndai oqu-jattyǧudy josparlauǧa ne türtkı bolǧanyn jäne qoiylǧan mındettıŋ qazırgı qauıp-qaterlerge qanşalyqty sai keletının anyqtaudy talap ettı.
"Qaruly Küşter basşylyǧy qordalanǧan tüitkılderdı jyldar boiy şeşe almai keledı. Būl elımızdıŋ qorǧanys qabıletıne nūqsan keltıredı. Ötken qaiǧyly oqiǧalardan sabaq almadyŋyzdar. Atalǧan oqu-jattyǧu jiynynyŋ mänı de, maqsaty da tüsınıksız. Ony kım äzırlep, bekıttı? Bas ştabtyŋ rölı qandai? Üilestıru jūmystaryna nege män bermegen? Nelıkten oqu-jattyǧu jiynynda Äskeri-teŋız küşterınıŋ bas qolbasşysy bolmaǧan? Jauapsyzdyq, salǧyrttyq, közboiauşylyq beleŋ alǧan. Jüielı jūmys joq. Daǧdarys jaǧdaiyndaǧy ıs-qimyl jospary syn kötermeidı. Mūnyŋ bärı – äskeri vedomstvo basşylyǧynyŋ nemqūraidylyǧynyŋ saldary", – dedı Memleket basşysy.
Tekseru barysynda äskeri qyzmettı ūiymdastyru, äskerdı jabdyqtau, sondai-aq onyŋ materialdyq jäne qarjylyq tūrǧydan qamtamasyz etıluı jan-jaqty zerdelenedı.
Qauıpsızdık Keŋesı Töraǧasynyŋ orynbasary Aida Balaeva basqaratyn komissiia jüielı sipat alǧan zaŋ būzuşylyqtardy anyqtap, kımderdıŋ jauapqa tartylatynyn aiqyndauy qajet. Memleket basşysy äskeri qyzmetşıler lauazymyna, şenıne qaramastan jauapqa tartylatynyn, zaŋ boiynşa qataŋ jazasyn alatynyn eskerttı. Atalǧan mäsele Prezidenttıŋ jeke baqylauynda.
“Būl oqiǧa armiiada olqylyqtar öte köp ekenın jäne käsıbilık jetıspeitının anyq körsettı. Äskerdı tübegeilı reformalaudy ıske asyratyn uaqyt keldı. Būl – kezek küttırmeitın mäsele. Men osyǧan bailanysty kadrlyq şeşımder qabyldadym. Sızderge Qazaqstan Respublikasynyŋ jaŋa Qorǧanys ministrı Myrzahmetov Aidos Säkenūlyn tanystyrǧym keledı. Aidos Säkenūly kürdelı kezeŋde qyzmetke kırısıp jatyr. Jauapkerşılık – öte joǧary, aldaǧy mındetter – asa kürdelı. Batyl şeşımder qabyldanuǧa tiıs”, – dedı Memleket basşysy.
Qasym-Jomart Toqaev qorǧanys vedomstvosynyŋ jūmysyn tübegeilı transformasiialau mäselesıne toqtaldy
“Jaqynda Qauıpsızdık Keŋesı Apparatymen ötken jiynda äskeri salada atqarylatyn basym mındetterdı aiqyndadym. Bızdıŋ armiia ötken ǧasyrda qalyp qoiǧan. Sonymen qatar qolbasşylyq jüiesın halyqaralyq üzdık täjıribege sai qaita qūru kerek. Keşendı täsıl qoldanu qajet. Al ol üşın baǧyt-baǧdarymyz anyq bolǧany jön. Būl dünietanymy keŋ, sauatty ofiserlerdıŋ ǧana qolynan keledı. Reformanyŋ maqsaty – jaŋa ülgıdegı äsker jasaqtau”, – dedı Memleket basşysy.
Prezident armiiada sifrlyq transformasiia jürgızudı, mümkındıgınşe adamdy tehnologiiamen almastyrudy tapsyrdy.
“Äskerdı damytudyŋ jaŋaşa täsılderı qajet. Taptauryn şeşımder, aldamşy amaldar, qaǧaz jüzınde bärın keremet etıp körsetetın ötırık esepter eşkımge qajet emes”, – dedı Prezident.
