Resei prezidentı Vladimir Putin armiianyŋ ştattyq sanyn 15,5 myŋ adamǧa arttyru turaly jarlyqqa qol qoidy, dep habarlaidy «Adyrna» tılşısı currenttime.tv-ge sılteme jasap.
Endı armiianyŋ jalpy sany 2 441 630 adamǧa jetıp, onyŋ ışınde 1 550 500-ı äskeri qyzmetker bolmaq.
Soŋǧy jetı ai ışınde būl armiianyŋ ştattyq sanyn törtınşı ret ūlǧaitu bolyp otyr. Būǧan deiıngı özgerıster nauryz, mausym jäne şılde ailarynda qabyldanǧan. Jalpy alǧanda, sol kezde armiia qataryna 52 500 ştattyq bırlık qosylǧan. Aldyŋǧy jarlyqqa säikes, 1 tamyzdan bastap Resei Qaruly küşterınıŋ ştattyq sany 2,43 million adamdy, onyŋ ışınde 1,54 million äskeri qyzmetkerdı qūrauy tiıs edı.
Reseidıŋ Ukrainaǧa qarsy keŋ auqymdy soǧys bastaǧanynan berı Vladimir Putin armiia sanyn ūlǧaitu turaly jetınşı jarlyqqa qol qoiyp otyr. Soǧys bastalǧanǧa deiın Resei Qaruly küşterınıŋ qūramynda 1,90 million adam, onyŋ ışınde 1,01 million äskeri qyzmetker bolǧan. Sodan berı äskeri qyzmetkerler sany 50 paiyzdan astam ösken.
Saratoga Foundation qorynyŋ aǧa ǧylymi qyzmetkerı Pavel Luzin The Insider basylymyna bergen sūhbatynda būl keŋeitudı «qaǧaz jüzındegı özgerıs» dep atap, onyŋ armiiada şyn mänınde qosymşa 15,5 myŋ äskeri qyzmetker paida boldy degendı bıldırmeitının aitty.
«Ştattyq bırlıkter, eŋ aldymen, naqty adamdardyŋ boluyn emes, qarjylandyrudy bıldıredı. Äskeriler keide qūrylys batalondaryn qaita qūrudy, keide basqa da qūrylymdardy aşudy josparlaidy. Osyndai maqsattarǧa bailanysty myŋdaǧan jaŋa ştattyq oryn engızıledı», – dedı ol.
Sarapşynyŋ aituynşa, jaŋa jarlyq «naqty adamdar turaly emes, ūzaq merzımdı perspektivadaǧy qarjy men lauazymdar turaly». Onyŋ pıkırınşe, äskeri qūrylymdar soǧystyŋ barysyna qaramastan, ūzaq uaqytqa joǧary deŋgeidegı qarjylandyrudy qamtamasyz etuge ūmtylady.
