Kreml Qazaqstan prezidentı Qasym-Jomart Toqaevtyŋ Germaniia kanslerı Fridrih Merspen ötken baspasöz mäslihatynda Resei basşysy Vladimir Putinge bergen baǧasyn joǧary baǧalaidy. Būl turaly Resei prezidentınıŋ baspasöz hatşysy Dmitrii Peskov mälımdedı, dep habarlaidy «Adyrna» tılşısı RİA Novostige sılteme jasap.
«Ärine, bız Qazaqstan prezidentınıŋ Vladimir Putinge bergen baǧasyn joǧary baǧalaimyz jäne oǧan rizaşylyǧymyzdy bıldıremız. Qazaqstanmen aradaǧy qarym-qatynasymyzdy, ekıjaqty bailanystarymyzdy erekşe qadırleimız», – dedı Peskov jurnalisterge.
TASS agenttıgınıŋ habarlauynşa, Peskov ekı el prezidentınıŋ jeke qarym-qatynasy jaqyn, syndarly ärı senımge negızdelgenın aitty. Onyŋ sözınşe, būl olardyŋ halyqaralyq kün tärtıbındegı eŋ kürdelı mäselelerdı, sonyŋ ışınde Ukrainadaǧy jaǧdaidy retteu mäselelerın de aşyq talqylauyna mümkındık beredı.
Būǧan deiın Qasym-Jomart Toqaev Fridrih Merspen ötken baspasöz mäslihatynda Vladimir Putindı Qazaqstan, Ortalyq Aziia, Europa jäne älem üşın eŋ qolaily saiasi tūlǧalardyŋ bırı dep sanaitynyn aitqan bolatyn. Toqaev Resei prezidentınıŋ «kürdelı tarihy bar ırı memlekettı basqaruǧa qajettı qasietterge ie ekenın, sondai-aq öz elı aldyndaǧy strategiialyq maqsattardy tereŋ tüsınetının» atap öttı.
Sol baspasöz mäslihatynda memleket basşysy Ukraina aumaǧyndaǧy qaqtyǧysty toqtatyp, diplomatiialyq nemese özge de kelıssözder üderısıne köşu qajettıgın taǧy da köterdı.
Osyǧan ūqsas mälımdemenı Toqaev biyl şılde aiynda Omby qalasynda Vladimir Putinmen kezdesuı kezınde de jasaǧan edı. Būǧan jauap retınde Resei prezidentı äskeri operasiianyŋ barysy turaly jan-jaqty aqparat bergen. Keiın Dmitrii Peskov Kievtıŋ ūstanymyn eskere otyryp, «qaqtyǧysty toqtatyp qoiu qazırgı jaǧdaida mümkın emes» ekenın mälımdegen.
