Resei Federasiiasynyŋ Bas prokuraturasy qazaqstandyq käsıpker, Freedom Holding Corp. negızın qalauşy Timur Tūrlovqa jäne bırqatar kompaniiaǧa qatysty Mäskeudıŋ Tver audandyq sotyna talap aryz berdı.
Sottyŋ elektrondy kartotekasynda äkımşılık talapker retınde RF Bas prokurorynyŋ orynbasary, al jauapkerler qatarynda Timur Tūrlov, Aleksei Şukin, sondai-aq W-Empirical Holding Corp., Freedom Holding Corp. jäne Freedom Finance Europe Ltd. kompaniialary körsetılgen.
Is boiynşa talaptardyŋ naqty mazmūny äzırge jariialanǧan joq. Aldyn ala sot otyrysy 15 qazanǧa belgılengen.
Freedom Holding baspasöz qyzmetı sotqa berılgen talap aryzdy zerttep jatqanyn mälımdedı.
Kompaniianyŋ habarlauynşa, holding Resei aumaǧynda qyzmet jürgızbeidı jäne elde aktivterı joq. Sondai-aq kompaniia būl ıstıŋ holding qyzmetıne eleulı qauıp töndıredı dep eseptemeitının jetkızdı.
Timur Tūrlov 2010 jyldary Reseide bank, brokerlık jäne investisiialyq baǧyttarda biznes jürgızgen. 2022 jyly ol Resei azamattyǧynan bas tartyp, Qazaqstan azamattyǧyn aldy.
Freedom Holding reseilık aktivterınen şyǧu prosesın sol jyldyŋ qazan aiynda aiaqtaǧan.
Būǧan deiın Reseide W-Empirical Holding Corp. kompaniiasyna qatysty qylmystyq ıs qozǧalǧan. Tergeu nūsqasy boiynşa, reseilık investorlar şeteldık aksiialardyŋ baǧasyn manipuliasiialap, kompaniiaǧa 150 million rublden astam şyǧyn keltırgen.
2025 jyldyŋ säuırınde reseilık sot investor Sergei Kuleşovtı W-Empirical Holding Corp.-tan 162 million rubl jymqyru ısı boiynşa üş jylǧa şartty türde bas bostandyǧynan aiyrǧan.
Aita keteiık, Timur Tūrlov Forbes Kazakhstan reitingı boiynşa 2026 jyly Qazaqstannyŋ eŋ bai 75 biznesmenı arasynda altynşy orynǧa ie boldy. Onyŋ bailyǧy 5,2 milliard dollarǧa baǧalanǧan. 2025 jyly käsıpker būl reitingte 5,8 milliard dollar bailyǧymen ekınşı orynda bolǧan.
