Atyrau qalasynda jūbaiyn kämeletke tolmaǧan qyzynyŋ közınşe asa qatygezdıkpen öltırgen 63 jastaǧy er adamǧa qatysty sot ükımı şyqty, dep habarlaidy "Adyrna" ūlttyq portaly.
Ol 15 jylǧa bas bostandyǧynan aiyryldy. Is materialdaryna säikes, qaiǧyly oqiǧa 16 nauryzǧa qaraǧan tünı Nūrsaia şaǧyn audanynda bolǧan. Tergeu mälımetınşe, otbasylyq janjaldan keiın 58 jastaǧy äiel 12 jastaǧy qyzymen bırge ūiyqtap jatqan. Osy kezde er adam asüiden pyşaq alyp kelıp, jūbaiyna bırneşe märte soqqy jasaǧan.
Anasynyŋ aiqaiynan oianǧan qyz äkesınen toqtauyn sūraǧanymen, äiel alǧan jaraqattarynan oqiǧa ornynda köz jūmǧan. Saraptama qorytyndysyna säikes, marqūmnyŋ denesınen 11 pyşaq jaraqaty anyqtalǧan. Sot otyrysynda qylmystyŋ qyzǧanyş saldarynan jasalǧany belgılı boldy. Aiyptaluşy jūbaiyn bırneşe jyl boiy opasyzdyq jasady dep küdıktenıp, onyŋ jürıp-tūruyn baqylap otyrǧan. Alaida tergeu barysynda būl küdıkke qatysty eşqandai dälel anyqtalmaǧan.
Sottaluşy öz kınäsın tolyq moiyndaǧanymen, qylmys jasaǧan sättı esıne tüsıre almaitynyn jäne sol kezde öz äreketın baqylamaǧanyn aitqan. Alaida sot-psihologiialyq-psihiatriialyq saraptama onyŋ qylmys kezınde öz äreketınıŋ mänın tüsınıp, özın-özı basqara alatyn jaǧdaida bolǧanyn körsettı.
Sot er adamnyŋ äreketın erekşe qatygezdıkpen jasalǧan adam öltıru dep tanyp, ony 15 jyl merzımge bas bostandyǧynan aiyru jazasyna kestı.
Sonymen qatar sot şeşımımen sottalǧan azamattan marqūmnyŋ äpkesınıŋ paidasyna moraldyq ziiandy öteu üşın 5 million teŋge öndırıldı.
Qaiǧyly oqiǧadan keiın erlı-zaiyptylardyŋ 12 jastaǧy qyzy qamqorşylyq organdarynyŋ qarauyna berılgen.
