Şymkentte mügedektıgı bar azamattarǧa arnalǧan 150 oryndyq jaŋa oŋaltu ortalyǧy aşyldy. Is-şaraǧa qala äkımı Ǧabit Syzdyqbekov qatysty.
Jaŋa äleumettık nysan Memleket basşysynyŋ tapsyrmasyna säikes, zamanaui oŋaltu ortalyqtarynyŋ jelısın damytu aiasynda, Bozaryq şaǧynaudanynda salyndy. Qūrylysy 2024 jyldyŋ jeltoqsanynda bastalyp, merzımınen būryn aiaqtalyp otyr.
Nysan 5,3 gektar aumaqta ornalasqan. Ǧimarattardyŋ jalpy audany şamamen 22 myŋ şarşy metrdı qūraidy. Keşen medisinalyq, oŋaltu, sporttyq, äleumettık jäne tūrǧyn infraqūrylymdy bırıktıretın bes bloktan tūrady.
Ortalyq I jäne II toptaǧy mügedektıgı bar azamattarǧa jartylai stasionarlyq formatta arnauly äleumettık qyzmet körsetuge arnalǧan.
Qala äkımı ortalyqtyŋ aşyluy Memleket basşysynyŋ tapsyrmasyn oryndaudyŋ maŋyzdy nätijesı ekenın atap ötıp, onyŋ qala tūrǧyndaryna sapaly oŋaltu kömegın aluǧa mümkındık beretının aitty.
«Prezidenttıŋ tapsyrmasyna säikes Şymkentte mügedektıgı bar azamattar keşendı kömek alyp, qolaily jaǧdaida oŋaltudan öte alatyn zamanaui ortalyq aşyldy. Mūnda densaulyqty qalpyna keltıruge, äleumettık beiımdeluge jäne belsendı ömırge oraluǧa barlyq mümkındık jasalǧan», – dedı Ǧabit Syzdyqbekov.
Keşen qūramynda üş qabatty oŋaltu korpusy, emdık-sauyqtyru basseinı, sport jäne akt zaldary, ekı qabatty stasionar, ashana, şeberhanalar jäne basqa da qajet bölmeler qarastyrylǧan.
Oŋaltu korpusynda därıgerler men mamandardyŋ kabinetterı, fizioterapiia, mehanoterapiia, massaj, sumen emdeu, logopediialyq jäne psihologiialyq kömek körsetuge arnalǧan bölmeler ornalasqan. Äleumettık jäne eŋbekke beiımdeu maqsatynda tıgın, qyş jäne slesarlyq şeberhanalar, şyǧarmaşylyqpen ainalysuǧa arnalǧan bölmeler men kıtaphana qarastyrylǧan.
Dene oŋaltuyna da erekşe köŋıl bölıngen. Emdık-sauyqtyru basseinı bır mezette – 46 adamǧa deiın, al sport zaly 25 adamǧa deiın qabyldai alady. Akt zaly 150 orynǧa eseptelgen, onyŋ ışınde mügedektıgı bar adamdar paidalanatyn arbalarǧa arnalǧan 40 oryn bar.
Qyzmet aluşylardyŋ uaqytşa tūruy üşın bır jäne ekı oryndy bölmelerden tūratyn ekı qabatty stasionar jasaqtalǧan. Olardyŋ arasynda mügedek arbasyn paidalanatyn azamattarǧa arnaiy beiımdelgen bölmeler de bar.
Ortalyq otandyq jäne şeteldık öndırıstıŋ zamanaui medisinalyq jabdyqtarymen, onyŋ ışınde arnaiy tehnikamen qamtamasyz etılgen. Qajet proseduralar aiaqtalǧan soŋ ortalyq azamattardy qabyldaudy bastaidy.
Aita keteiık, ortalyqtyŋ aşyluy Şymkent tūrǧyndarynyŋ oŋaltu jäne arnauly äleumettık qyzmetterge qoljetımdılıgın keŋeitıp, mügedektıgı bar azamattardyŋ densaulyǧyn qalpyna keltıruı men äleumettık beiımdeluıne qosymşa mümkındık beredı.
