Qazaqstanda materialdyq jaǧdaiy tūraqty azamattar memlekettık järdemaqylardan öz erkımen bas tartu turaly şeşımderın äleumettık jelılerde jariialauda. Olar memleket tarapynan körsetılgen qoldauǧa alǧys bıldırıp, äleumettık kömektıŋ şyn mänınde mūqtaj otbasylarǧa baǧyttaluy maŋyzdy ekenın atap ötude.
Köpbalaly ana Janat äleumettık jelıdegı jazbasynda memleketten berıletın järdemaqynyŋ otbasy üşın, äsırese balalary kışkentai kezınde, ülken kömek bolǧanyn jetkızgen. Qazırgı uaqytta balalary ösıp, otbasynyŋ jaǧdaiy jaqsarǧanyn aitqan ol keibır tölemderdıŋ toqtauyna qarsylyq bıldırmeitının atap ötken. Onyŋ pıkırınşe, balany düniege äkeludegı basty maqsat järdemaqy alu emes, ūrpaq jalǧastyryp, balalardy aman-esen ösırıp, jaqsy azamat etıp tärbieleu.
Sondai-aq Leshan Şaimerjenov Facebook äleumettık jelısındegı jazbasynda qazırgı jaǧdaiynyŋ jaqsy ekenın aityp, alyp jürgen jekelegen memlekettık järdemaqylardan öz erkımen bas tartu turaly şeşım qabyldaǧanyn habarlady. Ol osy uaqytqa deiın körsetılgen kömek üşın alǧys bıldırıp, «Är närsenıŋ öz retı bar. Elımız aman bolsyn!» dep jazǧan.
Atalǧan azamattardyŋ jazbalary qoǧamdaǧy äleumettık jauapkerşılık pen özara qoldau mäselesın kün tärtıbıne şyǧaruda. Olardyŋ ūstanymy boiynşa, otbasynyŋ materialdyq jaǧdaiy öz qajettılıkterın öz betınşe qamtamasyz etuge mümkındık berse, memlekettık qoldaudan bas tartu arqyly kömekke mūqtaj azamattarǧa basymdyq beruge bolady.
Sonymen qatar zaŋnamada belgılengen talaptarǧa säikes järdemaqy aluǧa qūqyǧy bar azamattardyŋ memlekettık qoldaudy paidalanuy zaŋdy ekenın atap ötken jön. Al tölemderden öz erkımen bas tartu – är azamattyŋ jeke şeşımı. Mūndai bastamalar qoǧamdaǧy äleumettık yntymaqtastyq pen azamattyq jauapkerşılıktıŋ maŋyzyn körsetedı.
