Reseige jūmys ısteuge baryp, keiın Ukrainadaǧy soǧysqa tap bolǧan qazaqstandyqtar maidan aimaǧynan şyǧaryldy, dep habarlaidy “Adyrna” tılşısı.
Zaŋger Meiırman Şekeev jelıdegı paraqşasynda soǧys şebınen şyǧarylǧan qazaq balalarynyŋ sany 11-ge jetkenın aitty.
Bastapqyda zaŋger äleumettık jelıdegı paraqşasynda soǧys aimaǧynan şyǧarylyp, Voronej qalasyna jetkızılgen jetı qazaqstandyq turaly habarlaǧan. Keiın jazbada 11 adamnyŋ şyǧarylǧanyn jazdy.
Azamattardyŋ Qazaqstanǧa qaşan oralatyny äzırge belgısız. Zaŋgerdıŋ aituynşa, Qazaqstan diplomattary Resei tarapymen kelıssöz jürgızıp jatyr. Şekeev te azamattardyŋ tuystarymen tūraqty bailanysta.
Zaŋger Qazaqstan SIM jūmysyn oŋ baǧalap, vedomstvo azamattardy elge qaitaru üşın bar küşın salyp jatqanyn atap öttı.
Reseige jūmys ısteuge barǧan qazaqstandyqtardyŋ Ukrainadaǧy soǧysqa tap bolǧany osy aidyŋ basynda belgılı boldy. Er adamdar bırneşe beineündeu jariialaǧan. Al 7 qazanda olardyŋ tuystary jaqyndaryn elge tezırek qaitarudy sūrap, Astanadaǧy SIM ǧimaratyna barǧan.
Olardyŋ aituynşa, Reseige küzet agenttıkterıne, et kombinattary men qūs fabrikalaryna jūmysqa ornalasu üşın barǧan. Alaida eŋbek şarttarynyŋ ornyna olarǧa Resei qaruly küşterınde qyzmet etu turaly kelısımşarttarǧa qol qoiu ūsynylǧan.
Bastapqyda topta 15 qazaqstandyq bolǧan. Keiın er adamdar topta toǧyz-on adam qalǧanyn, al qalǧandarynyŋ Ukrainadaǧy soǧys aimaǧyna jıberılgenın habarlaǧan.
Būǧan deiın Qazaqstan syrtqy ıster ministrlıgı Resei tarapymen kelıssöz jürgızıp jatqanyn jäne elge qaitarudy qajet etetın azamattardyŋ tızımın qalyptastyryp jatqanyn habarlaǧan.
