Oblys äkımı Prezidenttıŋ Ūlytau oblysyna jasaǧan saparynyŋ qorytyndylary negızınde äzırlengen aimaqty äleumettık-ekonomikalyq damytudyŋ 2022-2026 jyldarǧa arnalǧan keşendı josparynyŋ jobasyn ūsyndy, dep habarlaidy “Adyrna” ūlttyq portaly Ūlytau oblysynyŋ äkımdıgıne sılteme jasap.
Ūlytau öŋırınıŋ ekonomikasyn ärtaraptandyruǧa baǧyttalǧan maŋyzdy qūjat 240-tan astam ıs-şarany qamtidy. Olar äleumettık jäne öndırıstık infraqūrylymdy damytudy jäne öŋırdegı eŋ özektı mäselelerdı şeşudı közdeidı.
Qasym-Jomart Toqaevqa tanystyrylǧan keşendı josparda investorlar tartu, qatty küiınde keletın paidaly qazbalar öndırısın keŋeitu men jaŋa ken oryndaryn igeru, geologiialyq klaster qūru men ony damytu mäselelerı qarastyrylǧan. Būdan bölek, jaŋadan et öŋdeitın keşen, qūs fabrikasy men jylyjailar salu josparlanǧan.
Kelesı jyly jalǧa jäne nesiege berıletın 132,8 myŋ şarşy metr tūrǧyn üi qūrylysy, köpsalaly auruhanany jaŋǧyrtu, onkologiialyq dispanser men Jezqazǧan qalasynda zamanaui «Ana men bala» ortalyǧyn aşu jūmystary jürgızılıp, Ūlytau audanynda auruhana salynady. Sonymen qatar ärbır audan ortalyǧy men auyldarda 26 medisina mekemesı aşylady.
Berık Äbdıǧaliūly mädeni-aǧartu nysandaryn jöndeu jäne qaita qūru turaly da aitty. «Jaily mektep» ūlttyq pilottyq jobasy aiasynda 11 orta mektep pen 8 balabaqşa salu közdelgen.
Memleket basşysyna baiandalǧan özektı mäselelerdıŋ taǧy bırı – oblysty auyz sumen jäne sapaly joldarmen qamtamasyz etu. Qalalar men auyldardy sumen jabdyqtau jūmystary men su būru jüielerı qaita jaŋǧyrtylady. Sonymen qatar oblystyq maŋyzy bar 289,5 şaqyrym joldy, audandyq maŋyzy bar 112,5 şaqyrym joldy jöndeu men qalpyna keltıru josparlanǧan. Berık Äbdıǧaliūlynyŋ aituynşa, atalǧan ıs-şaralardy jüzege asyru barysynda 10 myŋnan astam jaŋa tūraqty jūmys orny aşylady.
Qasym-Jomart Toqaev Ūlytau oblysyn damytudyŋ 2022-2026 jyldarǧa arnalǧan keşendı josparyn maqūldap, tiıstı memlekettık organdarmen bırlesıp oryndaudy tapsyrdy.
“Adyrna” ūlttyq portaly
