Qytaılyqtar qazaq qyzdaryna qyzyǵýshylyq tanytýda

3853
Adyrna.kz Telegram

Jaqynda Qytaıdyń úlken aqparat agentikteriniń biri sina.com saıtynda belgisiz avtordyń maqalasy jarııalandy. Maqala taqyryby: «Qytaılyq týrıs jigitterdiń Qazaqstanǵa saıahattaýynyń basqasha sebebi» dep atalady. Aıtpaǵy, Qytaı jigitterin bizdiń elge qydyryp kelýge qyzyqtyratyn eń mańyzdy sebep — ádemi qyzdarymyz eken.

Qytaı saıtynda jarııalanǵan sýretter

Maqalada Qazaqstanda er men áıelder jan sanynyń tepe-teńdigi saqtalmaǵany aıtylady.

Er – az, áıel – kóp. Onyń ústine qyzdary óte sulý. Sondyqtan bul elde erler «erkelep» júr. Tipti, keıbir erler áıeliniń jumys istep, otbasyn asyraýyna úırenip alǵan. Sol úshin qytaı jigitter bul elge barsa «qyzdar bazaryn» qyzdyratyny sózsiz.

Qazaqstannyń qazirgi damýy ótken ǵasyrdyń sekseninshi jyldaryndaǵy Qytaıdy elestetedi. Bul eldiń jerasty baılyǵy mol. Damý oraıy kóp. Qytaı jigitteri eńbekqor, saýdanyń jaıyn jaqsy biledi. Qazaqstanǵa barsa úlken bolashaq kútip turǵany sózsiz. Ol elde bir jigit tórt áıel alýǵa bolady. Demek, bul jaǵdaı da qytaı jigitterdi batysty betke alýǵa jigerlendirýi tıis.

Eń mańyzdysy, eki el jaqyn kórshi. Memlekettik baılanys jaqsy. Eki eldiń bıligi jaqyn, dostyq qatynasta. Qazaqstanǵa barǵan qytaılyqtarǵa eshqandaı qıyndyq týmaıdy.

Mine, bizge buıyrǵan «qudaıy kórshimizdiń» kózdegeni osyndaı. Maqala avtorynyń bar oıy qytaılyqtardy barynsha qyzyqtyryp, Qazaqstanǵa tumsyǵynan jetelep alyp kelý ekeni kórinip tur.

Bir esepten, sheteldikterdiń bizdiń elge osyndaı túsinikpen qaraýyna ózimizde sebepkermiz. Máselen, «elimizde bir jigitke jeti qyzdan keledi» dep sandyraqtap júrgender qanshama. Aqylǵa syımaıtyn osy sóz talaı qyzdyń ózin qor sezinýine, aqymaqtaý jigitterdiń «qyztańdaǵysh» aýyrýǵa shaldyǵýyna sebep boldy. Oraıy kelgende aıta keteıik, statıstıka komıtetiniń málimeti boıynsha elimizde qazirgi tańda erler sany 8 865 101, áıelder 9 439 397 adam. Demek, paryq anaý aıtqandaı alshaq emes.

Ekinshiden, elimiz bıliginiń sheteldik kásipkerler men týrısterdi qushaq asha qarsy alatyn ustanymy olardy esirtip jibergeni shyndyq. Qazaqstanda tek qazaqtyń ǵana quqyǵy taptalatyn, al qalǵan ult pen halyqtyń qurmetke bólenetini jasyryn emes. Osyny bilip alǵan Qytaılar da óz azamattarynyń Qazaqstanǵa kelse jaman bolmasyn bilip otyr, habarlaıdy "Qazaq úni" portaly.

Pikirler