Qazaqstan mūsylmandary dıni basqarmasy mekteptegı qyzdardyŋ oramal taǧu mäselesıne qatysty öz ūstanymyn bıldırdı, dep habarlaidy Ūlt aqparat.
"QMDB jamaǧat tarapynan kiım mäselesıne qatysty joldanǧan sūraqtarǧa şariǧat boiynşa, baliǧat jasyna tolǧan mūsylman qyzǧa oramal taǧu mındet ekenın mälımdeidı. Qazaqstan mūsylmandary dıni basqarmasy elımızdegı mūsylman qyz-kelınşekter men äielderdı kiım kiiu ülgısınde qazaq halqynyŋ salt-dästürlerın saqtai otyryp, jinaqy kiınuge keŋes beredı. Al paranja (niqab) kiiudıŋ saltymyzda bolmaǧan, basqa eldıŋ ülgısı ekenın de erekşe atap ötkenımız jön.İslam şariǧatynda qyz balanyŋ baliǧatqa toluyn 9 jaspen şekteu dūrys emes. Mūsylman ǧalymdary qyz balalardyŋ fiziologiialyq erekşelıkterıne sai, köpşılıktıŋ jaǧdaiyn nazarǧa ala otyryp, 15 jaspen şektegen.
İslam dını baliǧat jasyna tolmaǧan, sanasy tolyq qalyptasyp ülgermegen, oramal taǧudyŋ tüpkı mänı men maŋyzyn, ükımın tüsınbeitın kışkentai qyz balasyna oramal taǧudy mındettemeidı. Ärbır mūsylman qyz bala oramaldyŋ qadır-qasietın tereŋ tüsınıp, jauapkerşılıgın sanaly türde sezınıp, Allanyŋ ämırın öz erkımen oryndauy basty maqsat. Mektep tabaldyryǧyn endı ǧana attaǧan büldırşındı jaulyq jabuǧa mäjbürleuden būryn oǧan eŋ äuelı bılım men tärbie bergen abzal. Būl – ata-ananyŋ basty mındetı.Alla Taǧala küllı adamzat balasyna imandy boludy ärı bılım aludy ämır etken. Qūran Kärımnıŋ eŋ alǧaş tüsken aiatynyŋ özı «Oqy!», degen būiryqpen bastaluy erekşe nazar audararlyq.
Sondai-aq Qūranda: «Rabbym, bılımımdı arttyr!», («Taha» süresı, 114), «Bıletınder men bılmeitınder bırdei bola ma?» («Zumar» süresı, 9), «Alla Taǧala senderdıŋ aralaryŋda iman keltırgender men boilaryna bılım darytqandardyŋ därejelerın ösıredı» («Mujädälä» süresı, 11) dep ılım ielerınıŋ märtebesınıŋ joǧarylyǧyn atap ötken.Ardaqty Paiǧambarymyz (Allanyŋ salauaty men sälemı bolǧai): «Bılım alu ärbır mūsylman er kısıge de, äielge de paryz»,– dep bılım ızdenudıŋ äielderge de tiıstı ekenın aitqan. Sondyqtan da, dınımızde mūsylman er kısı men äielge bılım alu – mındet. Al mektep jasyndaǧy balaǧa imandylyqqa baulyp, bılım üiretu – ärbır adamnyŋ azamattyq ärı mūsylmandyq boryşy. Dıni häm zaiyrly bılım alu – jarqyn bolaşaqtyŋ kıltı. Bügıngı zamannyŋ üderısı elımızdıŋ ärbır azamaty men lauazymdy tūlǧasyna bılımdı, imandy, otanşyl ūrpaq qalyptastyrudy talap etude. Būl – barşamyzdyŋ ūly boryşymyz, asyl mındetımız.
Bız mūsylman jamaǧaty men ata-analardy oqu oryndarynyŋ mektep oquşylarynyŋ kiım ülgısıne qatysty qoiylatyn talaptaryna tüsınıstıkpen jäne sabyrlyqpen qarauǧa şaqyramyz. Būl mäselenı uşyqtyru dūrys emes. Öitkenı elımızde oramalǧa tübegeilı tyiym salynbaǧanyn tüsınuımız kerek. Tek orta mektepterde kiım ülgısın bırızdılıkke tüsıru maqsatynda şeşım qabyldanǧan.Konstitusiiaǧa säikes, elımız zaiyrly memleket bolyp tabylady, onda azamattardyŋ ar-ojdan bostandyǧyna erkındık berılgen. Sonymen qatar, «Dıni qyzmet jäne dıni bırlestıkter turaly» Zaŋda dıni bırlestıkterdıŋ memlekettıŋ qyzmetıne aralaspaityny körsetılgen. Atalǧan Zaŋda elımızdegı bılım beru jäne tärbieleu jüiesı dın men dıni bırlestıkterden bölıngendıgı jäne zaiyrly sipatta bolatyndyǧy aitylǧan. Dındar azamattar qoǧamnan bölek ömır sürmeidı. Dınımızdegı boiūsynu – negızgı mındetterdıŋ bırı. Sondyqtan mūsylmandar zaŋǧa qūrmetpen qarauy tiıs.
Elımızdıŋ zaŋnamalary bızge balalarymyzdyŋ orta bılım aluyn qamtamasyz etuımızdı mındetteidı. Bılımsızdık bülıkke bastaitynyn ūmytpaiyq. Sondyqtan qyz balanyŋ tolyqqandy zaiyrly bılım aluyn ata-analary elımızdıŋ zaŋnamasy talaptary şeŋberınde qamtamasyz etkenderı jön.Alla Taǧaladan elımızdı türlı bülıkten saqtauyn tıleimız. Halqymyzdyŋ bırlıgı men berekesı arta bergei!" - delıngen basqarma mälımdemesınde.
