Jambyldyq poliseiler alǧaşqy dozadan-aq täueldılıkke äkep soǧatyn esırtkınıŋ eŋ auyr türlerınıŋ bırı geroin satumen ainalysqan küdıktını ūstaǧan beinejazbany jariialady. Küdıktı ūzaq uaqyt boiy oblys ortalyǧynyŋ aumaǧynda asa ırı mölşerde geroin ötkızumen ainalysqan.
Onyŋ tūrǧylyqty jerı boiynşa tıntu jürgızu barysynda üiınen jalpy salmaǧy 10 gramm geroin tabylyp, tärkılendı. Jedel-ızdestıru şaralary Jambyl oblysynyŋ Polisiia departamentı Esırtkı qylmysyna qarsy ıs-qimyl basqarmasy qyzmetkerlerınıŋ QR Ūlttyq ūlanynyŋ 5513 äskeri bölımınıŋ “Bürkıt” arnaiy maqsattaǧy bölınısımen bırlese “Qarasora-2022” respublikalyq ıs-şarasy aiasynda ötkızıldı.
Ūstalǧan azamat öz kınäsın moiyndap, uaqytşa ūstau izoliatoryna qamaqqa alyndy.
– Qazırgı uaqytta atalǧan derekke qatysty Qazaqstan Respublikasy Qylmystyq kodeksınıŋ 297-baby 3-bölıgı boiynşa (Esırtkı zattaryn ötkızu maqsatynda asa ırı mölşerde zaŋsyz saqtau) sotqa deiıngı tergeu amaldary bastaldy. Qazırgı taŋda osy qylmysqa qatysy bar basqa da tūlǧalardy anyqtauǧa baǧyttalǧan bırqatar tergeu jūmystary jürgızılude. Atalǧan bapqa säikes küdıktı 15 jylǧa deiıngı merzımge bas bostandyǧynan aiyryluy mümkın, – dep habarlady Jambyl oblysynyŋ Polisiia departamentı Esırtkı qylmysyna qarsy ıs-qimyl basqarmasynyŋ bastyǧy Asqar Jūmabekov.
