Jambyl oblysy PD Esırtkı qylmysyna qarsy ıs-qimyl basqarmasynyŋ qyzmetkerlerımen Taraz qalasynda esırtkı taratqan 25 jäne 19 jastaǧy ekı jergılıktı tūrǧyn ūstaldy.
Tıntu jürgızu barysynda küdıktılerden taratuǧa daiyndalǧan, 15 tüiınşekke oralǧan mefedron tärkılendı. Olardyŋ äleumettık jelıdegı jazbalaryn zerdeleu barysynda ūstalǧanǧa deiın esırtkını jasyrǧany anyqtaldy. Poliseiler esırtkınıŋ ary qarai taralmauy üşın jasyrylǧan oryndardy tauyp, joiu boiynşa şūǧyl şaralar qabyldady.
“Klienttermen” hat almasuda körsetılgen oryndar, iaǧni Taraz qalasy men qala maŋyndaǧy belgıler polisiia qyzmetkerlerınıŋ qyraǧylyǧymen alty saǧattyŋ ışınde joiyldy. Esırtkı jasyru oryndaryn ızdeu tün ortasyna deiın jalǧasty. Nätijesınde, mefedronnyŋ 29 jasyrylǧan orny anyqtalyp, aiǧaq zat retınde ıske tırkeldı.
Esırtkı satuşylardy ūstau nätijesınde mefedron esırtkı zaty salynǧan 44 tüiınşek tärkılenıp, olardyŋ jalpy salmaǧy 26 gramdy qūrady. Jambyl oblysy PD Esırtkı qylmysyna qarsy ıs-qimyl basqarmasy bastyǧynyŋ orynbasary Dınmūhambet Qoitorievtıŋ aituynşa, 15 jylǧa deiın bas bostandyǧynan aiyru jazasyn közdeitın mefedronnyŋ asa ırı mölşerı bar bolǧany 1 gramdy qūraidy.
Küdıktıler kınäsın moiyndap, Taraz qalasyndaǧy uaqytşa ūstau izoliatoryna qamauǧa alyndy.
