"Bıliktiń barlyq tarmaǵyna jańa, taza adamdardy ákelý qajet. Tek memleket múddesin oılaıtyn. Ondaı azamattar 19 mln halyq ishinen tabylady. Ekinshi. "Parızıtterdi" qurtý kerek, áıtpese qoǵamda úlken "epıdemııa" bolady". Bul pikirdi QR Parlamenti Májilisiniń depýtaty Edil Jańbyrshın óziniń feısbýk paraqshasynda qaldyrdy, dep jazady "Adyrna" ulttyq portaly.
"Eldiń kóńili referendýmǵa deıingideı emes. Jabyrqaý... Kútken jańalyqtyń, kóńilden shyqpaǵany kórinip tur. Sharyqtap ketken baǵa, tıtyqtatqan jumyssyzdyq, teńizdiń qasynda otyryp, aýyz sýǵa jarymaý, aıta berseń problema shash etekten. Qurylys jumystaryna qarjy jetispeıdi, jobalyq-smetalyq qujattar túgelge jýyq korrektırovkadan ótýi kerek. Oǵan da qarjy jetispeı jatyr deıdi qurylysshylar. Arty ne bolmaq? Mekteptegi saǵat qysqartýdan bosaǵan muǵalimder máselesi taǵy bar. Janar-jaǵar maı defııti. Biz munaı men gazdyń ústinde otyrǵan elmiz, úsh munaı óńdeý zaýytymyz bar. Bul qalaı sonda?! Qant tapshylyǵy neshe aı boldy áli rettelgen joq, retteletin túri de kórinbeıdi. Osylardy júıeli sheshýge baǵyttalǵan jobalar da kórinbeıdi. Bul bireýdi kinálaý emes, halyqtyń aıtyp otyrǵan nazy men syny",- deıdi Edil Jańbyrshın.
Depýtattyń aıtýynsha, qazir el qatty qınalyp otyr.
"Jaǵdaı "eski Qazaqstannanda" jaman bolyp ketti dep, aıtyp otyrǵandar bar. Meniń oıym aıtady: 1. Eski júıede jumys jasap qalǵan sheneýnikter, jańa jaǵdaıǵa beıimdele almaı, jańasha jumys jasaı almaı otyr. Eski "Jıgýlı" qansha ádemileseńde "Toıota" bola almaıdy. Qansha ret aıttyq, jańa kadrlar kerek dep. Bárin jasaıtyn adam, 8 aıda eshteńe jasaı almaǵan Úkimet, endi birdeńe qatyra qoıady degenge óz basym senbeımin. Renjimesin jigitter. 2. Áli kúnge sheıin ekonomıkany "jaýlap" alǵan olıgarhtar ketpegen. Sol baıaǵy "órkesh maıdy" sorý júrip jatyr. Bir shemadan, ekinshi shemaǵa aýysyp. Áıtpese kúni keshe tym jaqsy satylyp turǵan dızel otyny men benzın nege joq? Sol baıaǵy tarıfter, sol baıaǵy "otkattar", sol baıaǵy jemqorlyq, sol baıaǵy áýe bıletteriniń qymbatshylyǵy jáne t.s.s. 3. Sabotaj. Eski kadrlar men ekonomıkaǵa kirip alǵan "parazıtterdiń" oıy memleket basshysynyń halyq aldynda bedelin túsirip, taqtan taıdyrý. Aldaǵy ýaqytta olar ózderiniń qýattary men resýrstary kúırep, halyqtyń ál-aýqaty artatynyn biledi. Shamalary kelgenshe qarsylasýda. Qarsylyq barlyq salada jáne deńgeıde júrip jatyr! Ne isteý kerek? Bıliktiń barlyq tarmaǵyna jańa, taza adamdardy ákelý qajet. Tek memleket múddesin oılaıtyn. Ondaı azamattar 19 mln halyq ishinen tabylady. Ekinshi. "Parızıtterdi" qurtý kerek, áıtpese qoǵamda úlken "epıdemııa" bolady. Úshinshi. Muny tez jasaý kerek. Jańa jylǵa deıin. Shydamnyń da shegi bar ekenin umytpaǵan jón!", - deıdi depýtat.
"Adyrna" ulttyq portaly
