Jýrnalıst Dıas Nuraqyn baraholkadaǵy Baısat bazarynyń jumysshylary súre bilmese jalaqylarynan qaǵylyp jatqanyn jáne bazar basshylyǵy dinı fanatızmge urynǵanyn aıtty. Bul týraly ol áleýmettik jelide jazdy, dep habarlaıdy “Adyrna” ulttyq portaly.
«Almatydaǵy áıgili baraholka dinı fanatıkterdiń baqylaýynda sııaqty. Baısat bazarynda kúzetshi bolyp jumys isteıtin tanysym aılyq alý úshin quran súreleri men aıattardy jatqa bilýiń kerek dep aıdy aspanǵa biraq shyǵardy. Iaǵnı, aı saıyn jalaqynyń ýaqyty jaqyndaǵanda bazarǵa molda kelip kúzetshilerden emtıhan alady eken. Kimde kim súre nemese aıattan shatassa aılyǵynan 5 myń teńge ustap qalady deıdi. 4 ret qatelesseń jalaqyńnan 20 myń teńge joq degen sóz»,-dep jazdy ol áleýmettik jelide.
Sondaı-aq, jıi qateleskenderdi birden jumystan shyǵaryp jiberedi eken.
«Bárimiz biletin Fatıha men Baqara emes eń qıyn, qarılar ǵana jatqa soǵatyn súrelerdi suraıdy deıdi tanysym. Keı dybystarǵa tiliń kelmeı shatassań moldekeń aıqaılap, áńgir taıaq oınatady deıdi. Jasy egde tartqan kúzetshiler birazyn jattap alǵan. Al, otbasyn asyraý úshin 2-3 jerde jumys isteıtin jastarǵa obaldy dep otyr tanys aǵam. Kúzetshilerden synaq alatyn molda Jańaturmys meshitinen keledi eken-mys. Oǵan bazar basshylary kádimgideı aılyq tóleıdi deıdi. Ol azdaı barlyq kúzetshilerdi namaz oqýǵa májbúrleıdi eken. Burynnan kele jatqan bul ereje qańtardaǵy qyrǵynnan keıin sap tıylǵan. Biraq sońǵy 1-2 aıda qaıta bastalypty. Jańaturmystan keletin jańa molda qatal dep ashynyp otyr kúzetshiler», – dep jazdy D. Nuraqyn.
Onyń aıtýynsha, jumysshylar osy máseleniń bárin ashyq aıtýǵa, jýrnalısterdi shaqyryp shýlatýǵa qorqady. Birinshiden jumystan shyǵaryp jiberýi múmkin. Ekinshiden bul bazar Muhamedjan Tazabekpen birge sapasyz sýretke túsip qalǵan álgi kisiniki kórinedi. Sondyqtan ol qamaýda jatsa da áli qaýqary kúshti dep qorqady.
Jýrnalıst sondaı-aq Baısat bazaryndaǵy kúzetshilerden súre surap, aıat aıtqyzady degen aqparat 100% rastalǵanyn málimdedi. Ol boıynsha Dinı basqarma ókilderi ózderi jarııalaımyz dep ýáde bergen.
«Tek kúzetshiler emes bazardaǵy eden jýýshy, dala sypyrýshy, esepshi degen sııaqty barlyq qyzmetker dinı saýatty bolýy tıis degen qatań qaǵıda bar eken. Namaz oqymaıtyn, quran súrelerin bilmeıtinder jumysqa qabyldanbaıdy eken qysqasy. Ósek aıttyń, estigenińdi emes kórgenińdi jaz degen oqyrmandaryma sál sabyr saqtap, múftııattyń resmı málimdemesin kútýdi suraımyn. Olar jaltaryp ketse, barlyq derekti ózim jarııalaımyn»,- dep jazdy ol.
”Adyrna” ulttyq portaly
