QR Premer-Mınıstri Álıhan Smaıylov kásipkerlik qyzmette «taza paraqtan bastap» retteýdi engizý jáne memlekettik baqylaý men qadaǵalaýdy avtomattandyrý jóninde keńes ótkizdi, dep habarlaıdy « Adyrna» tilshisi.
Ulttyq ekonomıka mınıstri Álibek Qýantyrov kólik, saýda, qoǵamdyq tamaqtaný, qonaq úı qyzmetteri, jyljymaıtyn múlikpen operaııalar, taý-ken óndirý ónerkásibi, kompıýterlik baǵdarlamalaý, tutynýshylardyń quqyqtaryn qorǵaý, aqparat jáne baılanys salalaryndaǵy retteýshi aktilerge júrgizilgen taldaý aıaqtalǵanyn atap ótti.
Onyń qorytyndysy boıynsha anyqtalǵan 22 myńnan astam talaptyń shamamen 3,8 myńy (17%) jańa retteýshilik saıasattyń bazalyq sharttaryna sáıkes kelmeıdi, sondyqtan olardyń kúshi joıylady nemese qaıta qaralady.
Osy jumystyń birinshi kezeńi aıasynda taǵy jeti sala boıynsha taldaý jalǵasyp jatyr. Bul aýyl sharýashylyǵy, qoımalaý, qubyr kóligi, qurylys, avtomobılder men motoıklderdi jóndeý, kóshi-qon, avtorlyq quqyq jáne aralas quqyqtarǵa qatysty.
Premer-Mınıstr tıisti úılestirýdiń bolmaýynan keıbir memlekettik organdar belgilengen merzimderdi saqtamaıtynyn jáne bul bekitilgen jospar-kesteni oryndaýdy keshiktiretinin atap ótti.
«Bul reformanyń mańyzdy ekenin taǵy da qaıtalaımyn. Únemi keıinge qaldyra berýge bolmaıdy, bul týraly qansha aıtýǵa bolady? Barlyq negizsiz talaptardy tezirek alyp tastaýymyz kerek. Retteýshi aktiler boıynsha barlyq jumysty bıyl aıaqtaý qajet», — dedi Álıhan Smaıylov.
Premer-Mınıstr bızneske qoıylatyn jańa talaptardy engizýde óte muqııat bolý kerektigin aıtty.
«Jańadan qabyldanatyn retteýshilik talaptarǵa baqylaýdy kúsheıtýimiz kerek. Eger "Atameken" UKP tarapynan qandaı da bir másele boıynsha kelispeýshilik bolsa, onda bul máseleni sheshý kerek, buǵan kóz juma qaraýǵa bolmaıdy», — dedi Álıhan Smaıylov.
Sonymen qatar otyrysta memlekettik baqylaý júıesin tolyq avtomattandyrýǵa kóshý aıasynda memlekettik organdardyń aqparattyq júıelerin taldaý aıaqtalyp, salalyq táýekelder matrıalary qalyptastyrylǵany atap ótildi.
Búgingi tańda «Smart Data Ukimet» aqparattyq-taldaý júıesi jańartylyp jatyr, ony 2023 jyldyń ortasynda paıdalanýǵa berý josparlanyp otyr.
Sondaı-aq Premer-Mınıstr bul jumysty jandandyrýdy jáne memlekettik organdarmen kelisý merzimderin qysqartýdy qaıta qaraýdy tapsyrdy.
