Belgili etnograf, jazýshy, ádebıet zertteýshisi, ǵalym Aqseleý Seıdimbekke qoıylǵan eskertkishke qatysty Ulytaý oblysynyń ákimdigi túsinik berdi, dep jazady "Adyrna" ulttyq portaly.
Ulytaý oblysynyń ákimdigi eskertkish bıýdjettiń esebinen emes, tolyǵymen demeýshiler qarjysyna turǵyzylǵanyn jáne oǵan oblystyq ákimdik aralaspaǵanyn aıtty.
«Jańaarqa aýdanynda el azamaty Aqseleý Seıdimbekke arnalǵan eskertkish ashyldy. Ókinishke oraı, árıne, kórkemdik oryndalýy syn kótermeıdi. Osyǵan baılanysty, azdaǵan túsinik berý oryndy bolar. Birinshiden, eskertkish ne oblystyq, ne respýblıkalyq komıssııanyń qaraýynan ótken joq! Iaǵnı, birde-bir quzyrly memlekettik organ ony maquldaǵan joq. Degenmen, eskızi aýyzsha túrde aýdan ákimimen kelisilgen bolatyn. Ekinshiden, eskertkishti jasap, ornatýǵa bıýdjetten bir teńge de jumsalmaǵan. Tolyǵymyn demeýshilerdiń qarjysyna istelgen. Úshinshiden, jáne, eń bastysy, eskertkishti jasaýǵa tapsyrysty Aqseleý aqsaqaldyń týǵan-týystary jasady. Oblys ákimdigi buǵan aralasqan joq. Bul túsiniktemeni jazýdyń sebebi aqtalý emes, biraq túsinik berý. Endi bul máselemen aýdan bolyp, oblys bolyp aınalysamyz, oryn alǵan olqylyqty túzetemiz», - dedi Ulytaý oblysy ákiminiń orynbasary Ǵalymjan Qusmanǵalı.
Jańaarqa aýdanynyń ákimdigi bolsa eskertkish tapsyrys berýshilerge keri qaıtarylyp, ornyna basqa eskertkish ornatylatynyn málimdedi.
"Jańaarqa aýdany, Jańaarqa kentinde Aqseleý Slanuly Seıdimbekke arnalyp eskertkish boı kótergen bolatyn. Bul eskertkishti Aqseleý Slanulynyń inisi Asylhan Seıdimbek óz qarajaty esebinen jasatyp, barlyq qujattary durys ekendigin jetkizgen. Alaıda, búgingi kúni jańadan ashylǵan eskertkishke qatysty azamattar tarapynan birqatar narazylyqtar týyndaýda. Aqseleý músini meniń de kóńilimnen shyqpady. Osyǵan oraı, eskertkishti tapsyrys berýshilerge qaıtarý týraly sheshim qabyldandy. Ornyna talapqa saı, tulǵanyń beınesine sáıkes keletin eskertkish qoıý úshin tıisti sharalar qoldanylatyn bolady", - dedi Jańaarqa aýdanynyń ákimi Iýrjan Bekqojın.
"Adyrna" ulttyq portaly
