Jýyrda Atyraý qalasynda jumys istep kelgen «Aısha Bıbi», Almatydaǵy «Ǵalym» radıkaldy dinı baǵyttaǵy mektepke deıingi bilim oshaqtaryna arnaıy tekseris jumystary júrgizilip, olardyń teris aǵymda bilim bergeni anyqtalǵan, dep habarlaıdy Stan.kz.
Elimizdegi mektep oqýshylaryna oramal taǵýǵa tıym sala almaı jatqanda, dinı balabaqshalar qaptap ketti. Máselen, ótken jyly myńǵa jýyq kúmándi bilim oshaǵy anyqtalǵan.
Belgili bolǵandaı, onda 30 myńǵa jýyq bala radıkaldy aǵymda tálim-tárbıe alyp kelgen. Al búginde arnaıy is-sharalardyń arqasynda jat aǵymdy nasıhattap kelgen mektepke deıingi mekemelerdiń jumystary toqtatylypty.
«Byltyr búkil balabaqshalarǵa tekserý júrgizdik. Shynymen de olardyń arasynda dinı baǵyttaǵy balabaqshalar anyqtaldy, sonyń ishinde Almatyda jáne basqa qalalarda boldy. Atap aıtqanda, olardyń jumystary jergilikti atqarýshy organdardyń kúshimen toqtatyldy. Bul jerlerge dinı top músheleriniń balalary ǵana barǵan» – deıdi Qoǵamdyq damý mınıstriniń orynbasary Berik Aryn.
Máselen, jýyrda ǵana mınıstrlik Atyraý men Almaty qalasynda zańsyz júmys istep kelgen dinı balabaqshalardyń jumysyn toqtatýǵa májbúr bolǵan. Aqparatqa súıensek, jekemenshik «Ǵalym» jáne «Aısha Bıbi» atty mektepke deıingi mekemeler dinı baǵytta búldirshinderge tálim-tárbıe berip kelgen. «Negizgi problema jekemenshik balabaqshanyń bilim berýine qatysty boldy. Iaǵnı bir top azamattar Almaty qalasynda jekemenshik top ashqan. Sol mektep basshylyǵy ózderi bólek mekeme salyp aldyq. Sonyń ishinde ózimizdiń talappen júremiz degen maqsatpen balalar kele bastaǵan. Qyz balalar. Ásirese Batys óńirinen baryp, Almatyǵa kelip sol jerde bilim alamyz degen jaǵdaılar boldy» – deıdi QR Qoǵamdyq damý mınıstrliginiń qoǵamdyq kelisim komıteti tóraǵasynyń mindetin atqarýshy Balǵabek Myrzaev.
Astanadaǵy 4 jastan bastap balaǵa dinı turǵydan tálim beretin balabaqshanyń birinde erte jastan sábıge súre oqytyp, 6 jastan sájdege basyn tıgizýdi úıretetin ortalyq ıesi 3 jyl boıy bıznesin dóńgeletip kelgen. Mundaı balabaqshany izdep tabý ońaı emes. Tek qana tanys-tamyr arqyly ǵana tabasyz, deıdi mekeme meńgerýshisi.
«Men esimde bary Atyraý obl men Almaty qalasy. Halal balabaqshasy tek qana oqashaýlap, arnaıy dindarlardy qabyldap sabaq júrgizip, dinı tárbıeleý bolǵan. Biz aıttyq zańanama boıynsha balany tárbıeleıtin tek qana ata-anasy nemese zańmen belgilengen qorǵaýshylary. Eshkimde ony qandaıda bir dinge basqa bir aǵymǵa topqa tárbıeleýge quqyqtary joq» – deıdi QR Qoǵamdyq damý mınıstrliginiń qoǵamdyq kelisim komıteti tóraǵasynyń mindetin atqarýshy Balǵabek Myrzaev.
Qalaı desek te, ǵalamtor betterinde áli de «Musylman», «Halal» balabaqshasynyń jarnamasy jetip artylady. Eń qyzyǵy mundaı dinı bóbekjaılarǵa suranys ta bar.
Osylaısha, mınıstrlik radıkaldy baǵyt ustanattyn toptardyń basym bóligi Ońtústik pen Batys Qazaqstanda shoǵyrlanǵanyn jetkizdi. Qazir bul óńirde keńinen nasıhat jumystary júrgizilip, dinı ustanymy bolǵan balabaqshalar jabylyp, keıbiri zańǵa sáıkes jumys isteýge kóshipti.
