Memleket basşysy Qasym-Jomart Toqaevtyŋ tapsyrmasymen Parlament Senatynyŋ Töraǧasy Mäulen Äşımbaev Ūlybritaniia jäne Soltüstık İrlandiia Qūrama Koroldıgınıŋ Patşaiymy II Elizavetany memlekettık jerleu räsımıne qatysty. Atalǧan räsım 2022 jylǧy 18-19 qyrküiek künderı London qalasynda öttı. Būl turaly Senattyŋ baspasöz qyzmetı habarlady, dep jazady "Adyrna" ūlttyq portaly.
Senat Spikerı 18 qyrküiekte Vestminster hollynda Patşaiymnyŋ tabytyn ziiarat etu räsımıne qatysyp, Qazaqstan Respublikasynyŋ atynan resmi köŋıl aitu kıtabyna jazba qaldyrdy. Ol II Elizaveta asa körnektı köşbasşy jäne britan ūltynyŋ bırlıgı men tūraqtylyǧynyŋ simvoly bolǧanyn, aldaǧy uaqytta da Patşaiymnyŋ tektılıgı, qadır-qasietı men jetıstıkterı älemdegı milliondaǧan adamdy jıgerlendıre beretının atap öttı.
Sol künı Mäulen Äşımbaev Bukingem saraiynda Korol III Charlzdıŋ Europa, Taiau Şyǧys jäne Aziia elderınıŋ, ükımetter men halyqaralyq ūiymdardyŋ basşylarynyŋ jäne koroldık otbasy müşelerınıŋ qūrmetıne arnalǧan qaraly qabyldauyna qatysty. Senat Töraǧasy Korol III Charlzben sūhbat barysynda Memleket basşysynyŋ atynan köŋıl aityp, el Prezidentınıŋ şeşımı boiynşa jaqyn arada Astananyŋ ortalyq saiabaǧyndaǧy gülzarlardyŋ bırıne II Elizaveta Patşaiymnyŋ esımı berıletının jetkızdı. Ūlybritaniia monarhy mūrager hanzada retınde 1996 jyly Qazaqstanǧa jasaǧan saparyn eske aldy. Sondai Korol Patşaiymnyŋ qazasyna bailanysty yqylas tanytqany üşın rizaşylyǧyn bıldırıp, Qazaqstan basşylyǧy men halqyna igı tılekterı men ıltipatyn jetkızdı.Qazaqstandyq delegasiia 19 qyrküiekte Vestminster abbattyǧynda ötken II Elizaveta Patşaiymdy jerleu räsımıne qatysty. Bızdıŋ el delegasiiasynyŋ qūramynda Syrtqy ıster ministrınıŋ orynbasary Roman Vasilenkonyŋ bolǧanyn da atap ötken jön. Räsımge 2000-ǧa juyq meiman qatysty. Olardyŋ qatarynda koroldık otbasynyŋ müşelerı, memleket jäne ükımet basşylary, diplomattar men qoǧam ökılderı bar. Aita keteiık, būǧan deiın Qazaqstan Prezidentı Qasym-Jomart Toqaev Korol III Charlzge köŋıl aitu jedelhatyn joldady. Onda Memleket basşysy Qazaqstan halqynyŋ jäne jeke özınıŋ atynan Koroldıŋ, koroldık otbasy men barlyq britandyqtyŋ qaiǧysyna ortaqtasyp, köŋıl aitty. Sondai-aq el Prezidentı Ūlybritaniianyŋ Qazaqstandaǧy elşılıgıne baryp, köŋıl aitu kıtabyna jazba qaldyrdy.
"Adyrna" ūlttyq portaly
