Qazaqstannyŋ ırı qalalaryna Reseiden keluşıler sany kürt ösuı mümkın. Būl Putin jariialaǧan jartylai jūmyldyrumen bailanysty bolmaq, dep habarlaidy “Adyrna” ūlttyq portaly.
«Äskeri qyzmetke qazırgı uaqytta zapastaǧy jäne eŋ aldymen Qaruly Küşter qatarynda äskeri boryşyn ötegen, belgılı bır äskeri mamandyqtary jäne tiıstı täjıribesı bar azamattar ǧana şaqyrylady. Äskeri qyzmetke şaqyrylǧandar bölımderge jıberılgenge deiın arnaiy äskeri operasiia täjıribesın eskere otyryp, mındettı türde qosymşa äskeri daiyndyqtan ötedı», - dedı Resei prezidentı Vladimir Putin telearna arqyly söilegen sözınde.
“Chinovnik” telegram arnasynyŋ aituynşa, Almaty jäne basqa da ırı qalalarda sūranystyŋ artuyna bailanysty päterlerdı jalǧa alu baǧasynyŋ taǧy da ösuı kütılude. Qonaqüiler, kölık qyzmetterı jäne qoǧamdyq tamaqtanu oryndarynyŋ baǧasy qymbattauy mümkın.
“Qalai bolǧanda da, qazaqstandyq arnaiy qyzmet pen poliseiler qyraǧy boluy kerek. Halyqqa qyzmet körsetu ortalyqtaryna jükteme artady, bank qyzmetıne sūranys artady.
Al jaǧymdy jaǧy, eŋbek naryǧy joǧary bılıktı kadrlarmen, sonyŋ ışınde IT jäne qyzmet körsetu salasyna tolyǧady. Jalpy, jaŋa kadrlardyŋ keluı esebınen qalalardyŋ bäsekege qabılettılıgınıŋ artuy kütılıp otyr. Endeşe, jergılıktı tūrǧyndar jaŋa şyndyqtan adasyp qalmai, bır qadam alda boluy kerek.
Aitpaqşy, keşeden berı Google ızdeu jüiesınıŋ reseilık segmentınde jūmyldyru jäne elden ketuge bailanysty sūranystar kürt östı”, - dep jazdy “Chinovnik” telegram arnasy.
“Adyrna” ūlttyq portaly
