Ǵylym jáne joǵary bilim mınıstri Saıasat Nurbek eshkimge eskertpesten, tosyn túrde Semeıdegi stýdentterdiń jataqhanalaryn aralady. Aldymen Shákárim ýnıversıtetindegi nysandarǵa bas suǵyp, ondaǵy jaǵdaıdy kózimen kórdi. Stýdentterdiń oqý úrdisine qatysty san-calaly saýaldaryn tyńdap, jataqhana qyzmetkerlerimen de tildesti.
Qazir Shákárim ýnıversıtetinde 1120 oryndyq 4 jataqhana bar. Jataqhanalarǵa 791 stýdent jaıǵastyrylǵan. Áli de bos oryndardy toltyrý jumystary júrgizilip jatyr.
Mınıstr keıinnen Álıhan Bóleıhan ýnıversıtetindegi nysandardy aralady. Atalmysh ýnıversıtettiń 400 stýdenti jataqhanaǵa ornalasqan. Taǵy 400 oryndyq ekinshi ǵımarat qazan aıynyń sońynda stýdentterge esik ashyp, jaıly úıine aınalmaq.
Eskerte keteıik, búgingi tańda elimiz boıynsha 104 joǵary oqý ornyna tıesili 309 jataqhanada 101 myńnan astam stýdent turady. Bıyl taǵy 5 myń orynǵa arnalǵan 17 jataqhana paıdalanýǵa berilmekshi. Sonymen qatar, ǵylym jáne joǵary bilim mınıstri óz sózinde Almatydaǵy 1 kýrs stýdentteri jataqhanamen tolyq qamtylǵanyn erekshe atap ótti.
"Adyrna" ulttyq portaly
