Şeteldık qazaqtardy qoldau alqasy Toqaevqa şeteldegı qazaqtardy elge qaitaru turaly ündeu joldady

Şeteldık qazaqtardy qoldau alqasy Prezident Qasym-Jomart Toqaevqa şeteldegı qazaqtardy elge qaitaru turasyndaǧy ündeu joldady, dep habarlaidy “Adyrna” ūlttyq portaly. Ündeu mätının jariialaudy jön kördık: QR Prezidentı Q.K.Toqaevqa Şeteldegı qazaqtardy elge qaitaru turasyndaǧy ündeu Qūrmettı Qasym-Jomart Kemelūly! 2022 jyl Qazaqstan üşın türlı demografiialyq oqiǧalarǧa toly bolyp otyr. Onyŋ bır naqty körınısı - soŋǧy aptadaǧy Resei basşylyǧynyŋ azamattardy Ukrainamen aradaǧy soǧysqa jūmyldyru boiynşa şeşımıne bailanysty sol eldıŋ azamattarynyŋ şetelge, sonyŋ ışınde Qazaqstanǧa qarai bosuy. Ärine, halyqaralyq ūiǧarym boiynşa adam qūqyǧyn qorǧau jolyndaǧy mındetımızge qarai reseilıkterdı qabyldauymyz jön. Bıraq būnyŋ eldıŋ ışkı qoǧamdyq-saiasi ahualyna keraǧar tūsyn aitpaǧannyŋ özınde, demografiialyq äljuazdyǧymyzdy odan saiyn örşıte tüsetındıgın täuelsız memleket retınde eskeruge tiıspız. Eldıŋ tarihynda HH ǧasyrdyŋ 20-30 jyldary qazaq halqynyŋ tarapyna Sovettık ökımet jasaǧan Aşarşylyq pen quǧyn-sürgın qyrǧyny kesırınen myŋdaǧan qazaqtar bala-şaǧasymen şetelge bosqany mälım. Aman jetken solardyŋ bügıngı ūrpaqtary äuelı Qytai men Auǧanstan elderıne, odan ärı Päkstan, Saud Arabiiasy, İran, Türkiia taǧy basqa şetelderge auuǧa mäjbür boldy. Būlardyŋ bügıngı ūrpaǧyn elge qaitaruǧa tarihi otany retınde Qazaqstan älı künge naqty şeşım qabyldaǧan joq jäne jüielı joba men baǧdarlamany ıske asyrǧan emes. Osynyŋ kesırınen qazaqtardyŋ taǧy da özınıŋ tarihi otanynda azşylyqqa ūşyrau qaterı tuyndady. Al şeteldegı qandas bauyrlardyŋ jas ūrpaǧy sol elderge sıŋıp ketu üderısı jürıp jatyr. Soŋǧy 30 jyl boiǧy bastalǧan būl saladaǧy jūmys jüiesız jäne körnekılıkke ǧana qūrylǧan, paraqorlyq pen jemqorlyq jailaǧan salanyŋ bırıne ainaldy. Būǧan deiıngı ıstelgen repatriasiia jüiesız, jürdım-bardym jasalǧan şaralar.Elge keluge, tıptı eşbır jaǧdai sūramauǧa peiıl bıldırgen qandastar, äsırese Auǧanstanda qalǧan, tuystary elge oralyp ülgergen azamattardyŋ qazaq ekendıgıne kümänmen qaraityn jeleu būǧan jol bermei otyr. Älı künge «qandas» märtebesın beruge jatatyn şeteldegı qazaqtardy moiyndau erejesı bekıtılmegen! Şeteldık qazaqtar tarapyna tarihi otany retınde Qazaqstannan berıletın viza mäselesı, gumanitarlyq kömek pen aǧartu salasy boiynşa jūmystar eşqandai jolǧa qoiylmaǧan. «Düniejüzı qazaqtarynyŋ qauymdastyǧy» atalatyn ūiymnyŋ jūmysy müldem syn kötermeidı. Qūrmettı Prezident! Egemen elımızdıŋ aldynda demografiialyq tūrǧydan ülken synaq kütıp tūr. Eldıŋ demografiialyq ahualy - memlekettıŋ qauıpsızdıgı men halyqtyŋ amandyǧyna jäne onyŋ damuyna tıkelei qatysy bar basty faktordyŋ bırı retınde tez arada memlekettık şeşım qabyldauǧa jatatyn mäsele. Osyǧan säikes Sızden tyŋǧylyqty şeşım kütemız! Şeteldık qazaqtardy qoldau alqasy. 30 qyrküiek 2022 jyl. Qūrmetpen Şeteldegı qazaqtardy qoldau Alqasynyŋ müşelerı: Serık Erǧali (Astana), Dos Köşım (Almaty), Qydyrälı Oraz (Ūly Britaniia, London), Beisen Ahmetūly (Astana),Aqpar Aiubi (Daniia), Abdulla, Amidulla Tadaş (Auǧanstan, Qabul), Hamid (Pakistan, Karachi), Ahmad Qojabaev (Saud Arabiia, Mekke), Mohammad Tabyn (Auǧanstan), Seifolla (İran, Gorgan), Jora Tabyn (İran), Madjanov Qaliolla Aihojaūly (Şymkent), Jūmat Gaziz (Semei), Jarqynbek Seitımbet (Şymkent), Bauyrjan Berdıbaiūly (Jaŋaözen), Saduaqasova Aqmaral Qaiyrbekqyzy (Astana), Sūltanbek Taşkenbai (Aqtöbe), Ermek Eşmūhanbetūly (Taldyqorǧan), Bekarystan Myrzabai (Aqtöbe), Jakeb (Almaty), Talǧat Mūsaqūlūly (Jambyl oblysy Jualy audany), Esentügel Eleuken (Astana), Däuren Quat (Almaty), Aiatjan Ahmetjan (Astana), Kuldariǧa Rom (Pavlodar), Berkalieva Küliman Abdygalievna (Almaty oblysy) taǧy basqalar.