«Álemniń ózgerýin qalasań, sol ózgerýdiń alǵashqysy óziń bol», – dep naqyl sózin keıingi urpaqqa mura retinde qaldyryp ketken Mahatma Gandıdiń eren eńbegin búgingi úndi halqy ǵana emes, dúnıejúzi halyqtary da máńgi este tutyp, jyl saıyn 2 qazanda qaısar tulǵany eske alý maqsatynda álem boıynsha «Halyqaralyq zorlyq-zombylyqsyz kúni» retinde atap ótedi.
Osyǵan oraı, 2 qazan 2022 jyly ál-Farabı atyndaǵy QazUÝ, Shyǵystaný fakýlteti, Taıaý Shyǵys jáne Ońtústik Azııa kafedrasy, únditaný bólimi Úndistannyń Almatydaǵy konsýldyǵynyń ókilderimen birlese otyryp, Almatydaǵy Gandı saıabaǵynda M.K. Gandıdiń týǵan kúnine arnalǵan eske alý sharasyn ótkizdi.
Gandı saıabaǵynda atalyp ótken shara eki eldiń Ánurandarynyń oryndalýymen bastalyp, únditaný bóliminiń stýdentteri tarapynan Úndistannyń ult kósemi M.Gandıdiń naqyl sózderiniń oqylýymen aıaqtaldy. Sonymen qatar Úndistannyń Almatydaǵy ókildiginiń konsýly Amıt Kýmar Mıshra myrza sóz alyp, qala qonaqtary men búkil úndi halqyn ataýly merekemen quttyqtap, jyly lebizin bildirdi. Rýhanı-tanymdyq dıalogty júzege asyrýdy maqsat etken shara barysynda úndi ultynyń birtýar danasy, saıası qaıratker Mahatma Gandıdiń ómiri men eńbekteri týraly qundy oı-pikirler aıtyldy.
Darıǵa Kokeeva
Shyǵystaný fakýlteti
Taıaý Shyǵys jáne Ońtústik Azııa kafedrasynyń meńgerýshisi
