Toǧysta infraqūrylym jaŋǧyruda

Şymkent qalasynyŋ äkımı M.Äitenov qalaǧa ırgeles jatqan Toǧys tūrǧyn alabyna baryp halyqpen kezdestı, eldı mekende jaŋǧyrtylyp jatqan injenerlık infraqūrylym qūrylysyn tekserdı. Qazırgı taŋda mūnda 7500-ge juyq halyq tūrady. Mektep, balabaqşa, mädeniet üiı, därıgerlık ambulatoriia, sport jäne balalar oiyn alaŋşasy, taǧy da basqa äleumettık nysandar qarastyrylǧan. Alaida atqaryluǧa tiıs bırşama jūmystar bar. Solardyŋ bırı - ūŋǧyma salu. Būl öz kezegınde Toǧys, Ainatas, Eltai eldı mekenındegı 11 myŋǧa juyq halyqty auyz sumen qamtamasyz etuge septıgın tigızedı. Qazırgı taŋda qūrylys jūmystary qarqyndy. Toǧystan 73 metrlık su ūŋǧymasy qazylyp, bolat qūbyrlar salynuda. Aita keterlıgı, būl su ūŋǧymasy qosymşa ūŋǧyma retınde jaz ailarynda qoldanu üşın kerek. Qala äkımı tekseru barysynda jūmystyŋ belgılengen merzımınen keşıkpei, sapaly oryndaluyna küş saluymyz qajet dep, jauapty mekemelerden nätijelı jūmys körsetuın talap ettı. Jalpy Toǧys jūrty auyz sudan tapşylyq körmegen. Qamtylu körsetkışı 98,5 % qūraidy. Sol siiaqty elektr jaryǧyn tūtynuşylar da 99%. Biyl 11 abonenttı jaryqpen qamtu üşın jaŋadan baǧanalar ornatylyp, elektr jelılerı tartyldy. Tabiǧi gazben qamtylu körsetkışı de 98% qūraidy, tek jaŋaqūrylys aumaǧyndaǧy 31 tūtynuşynyŋ mäselesın şeşu üşın kelesı jyly jobalyq smetalyq qūjaty äzırlenedı. Mūndaǧy joldarǧa da asa nazar audaryluda. Byltyr 2 köşe “Aqmaia”men “Aiyrşyq” ortaşa jöndeuden ötse, biyl 4 köşege asfalt töseldı. Jalpy mūnda 18-köşe bar. Sonymen qatar osy jyly 2 köşe “S.Ospanov” jäne “Mūnaibarlauşylar” köşesı jaryqtandyryldy. Şymkent qalasy äkımdıgınıŋ baspasöz qyzmetı