«SHYMKENT TOWER» sauda-ıskerlık ortalyǧy boi kötermek

Bügın qala äkımı M.Äitenov Qonaev daŋǧyly boiynda boi tıkteitın «Shymkent Tower» sauda-ıskerlık ortalyǧynyŋ qūrylysynyŋ bastaluyna orai ūiymdastyrylǧan ıs-şaraǧa qatysty. Būl jobanyŋ negızgı investory “SAUTS-Oil” kompaniiasy, al qūrylysyn saluşy bas merdıger «Koç Construction». “Aldaǧy 5 jyl ışınde qalaǧa 5 mlrd AQŞ dollary kölemınde investisiia tartu mındetın qoidyq. Al bügın Şymkent qalasy üşın bıregei joba bastau alady. Bastamaǧa sättılık tıleimın. Jalpy qazırgı kezde megapoliste tūrǧyn üige degen sūranys artqan, aglomerasiiasy damyǧan şaharymyzǧa keluşıler men üi alyp qoiuǧa niettıler köbeigen. Sondyqtan käsıpkerlerdı Şymkentke investisiia saluǧa şaqyramyn,”-dedı şahar basşysy M.Äitenov. S.Seitjanov jaŋa nysannyŋ salynuy - ekonomika men qala körkıne körık qosatynyna senım bıldıre kele, "Bügıngı şaraǧa arnaiy kelıp qatysqanyŋyz üşın alǧys bıldıremın, qūrmettı Mūrat Düisenbekūly! Osy künge deiın äkımdıkpen tyǧyz jūmys ıstep kelemız, aldaǧy uaqytta da qalamyzdyŋ damuy jolynda bırge köptegen jobalardy jüzege asyratyn bolamyz",-dedı. Al «Koç Construction» - halyqaralyq qūrylys salasyndaǧy täjıribelı kompaniia. Jarty ǧasyrlyq tarihy bar. 1959 jyldan berı 3 materikte qūrylys salyp, älemnıŋ 9 elınde ırı-ırı jobalardyŋ jüzege asuyna atsalysqan. Solardyŋ bırı - körşı Özbekstan elınıŋ eŋ maŋyzdy jobasy sanalǧan “Taşkent Siti” qūrylysynyŋ negızgı basym bölıgın jürgızıp, qazırgı taŋda 3,5 mln2 m şamasyndaǧy nysannyŋ qūrylysyn saluda. Sonymen qosa «Hilton» qonaq üiınıŋ qūrylysyn da atalmyş kompaniia jürgızgen. Būdan basqa da jetıstıkterın aityp ötken kompaniia direktory Omer Sarikoch “Orta Aziiadaǧy aumaǧy eŋ ülken bolyp tabylatyn bauyrlas elımız - Qazaqstanda alǧaşqy investisiialaudy milliondy qala - Şymkentten bastaǧanymyzǧa öte quanyştymyz. Būl ǧimarat progrestıŋ, damudyŋ, iaǧni alǧa qarai ūmtyludyŋ negızgı simvoly bolady. Şym şaharǧa aldaǧy uaqytta da basqa salalar boiynşa investisiia saluǧa daiynbyz”-dep atap öttı. Jalpy Şymkent qalasy 2020 jyly negızgı kapitalǧa baǧyttalǧan investisiialar kölemınıŋ ösu körsetkışı boiynşa respublikada ekınşı orynda bolǧan bolsa, 2021 jyldan bastap qazırgı uaqytqa deiın Qazaqstan öŋırlerınıŋ reitingısınde tūraqty türde köş bastap keledı. Aityp öteiık, «Shymkent Tower» sauda-ıskerlık ortalyǧyn salu barysynda 200 tūraqty jäne 1250 uaqytşa jūmys orny aşylmaq.