«Samruk-Kazyna Trust» áleýmettik jobalardy damytý qorynyń qoldaýymen Atyraý oblysynyń isker áıelder qaýymdastyǵy «Áreket» jobasyn bastady. Joba aıasynda jalǵyzbasty, kópbalaly analar, jumyssyz áıelder ózderiniń qarjylyq táýelsizdigin qamtamasyz etý úshin kásibı daǵdylardy ıgerip, naqty kómek ala alady. Alǵashqy dáristiń qatysýshylaryn «Samruk-Kazyna Trust» qorynyń ókilderi kelip quttyqtady.
«Samuryq-Qazyna» AQ qazaqstandyqtardyń ekonomıkalyq jaǵdaıyn jáne tutastaı alǵanda memlekettiń qarjylyq turaqtylyǵyn nyǵaıtýǵa múmkindik beretin bilim bastamalaryn árkez qoldaıdy. Óńirlik jobalardy qarjylandyra otyryp, biz jergilikti jerlerde ózekti áleýmettik máselelerdi sheshemiz. Sondyqtan bizge jergilikti ÚEU-dan tyń ótinimder qabyldaý óte mańyzdy», -dep atap ótti «Samruk-Kazyna Trust» qorynyń bas dırektory Alfııa Adıeva.
Joba aıasynda 100 áıelge arnalǵan oqytý kýrstary uıymdastyrylyp, odan keıin túlektergeshaǵyn bıznesterin ashýǵa kómek kórsetiledi. Bıýdjeti shamamen 48 mıllıon teńgeni quraıtyn joba 2022 jyldyń qazanynan 2023 jyldyń aqpanyna deıingi aralyqta júzege asyrylýda.
Shalǵaıdaǵy aýyldar men aýdandardyń turǵyndaryn osy bastamamen tanystyrý maqsatynda Atyraý oblysynyń isker áıelder qaýymdastyǵy Qurmanǵazy, Isataı, Inder, Mahambet, Jylyoı, Maqat, Qyzylqoǵa aýdandarynyń, sondaı-aq Erkinqala, Keńózek, Almaly, Damba, Aqsaı, Qaıyrshaqty eldimekenderiniń jáne Atyraý qalasynyń turǵyndarymen kezdesýler ótkizdi.
6 aptalyq oqý kýrstary negizgi jáne qosymsha oqý blogynan turady. Negizgi baǵyttarǵa kelesi mamandyqtar kiredi: «Tigin», «Aspazdyq»,«Shashtaraz» jáne «Tazalaý qyzmetteri». Qosymsha kýrstar «Kásipkerlik daǵdylardy oqytý», «Kontent jáne SMM – áleýmettik jelilerdi damytý», «Sheshendik óner, kópshilik aldynda sóıleý daǵdylary» boıynsha qarastyrylǵan. Sonymen qatar, joba túlekterine 3 aı boıy tálimger-kýratory birge júrip qoldaý kórsetedi.
«Oqý aıaqtalǵannan keıin bizdiń túlekterimiz100% óz isin ashýǵa taýarlar túrinde grant ıelense, olardyń keminde 50%-y óz bıznesin ashýǵa múmkindik alyp, 30%-y jumysqa ornalasady», - dedi Atyraý oblysynyń isker áıelder qaýymdastyǵynyń tóraıymy Fatıma Tóleeva.
Atyraý oblysynyń isker áıelder qaýymdastyǵy 2013 jyldan bastap áıelder kásipkerligin damytý jáne ómirlik qıyn jaǵdaıǵa tap bolǵan áıelderge qaıyrymdylyq kómek kórsetý jónindegi áleýmettik jobalardy belsendi júzege asyryp keledi. Qazirgi ýaqytta qaýymdastyq shaǵyn jáne orta bıznestiń isker áıelderin, kópbalaly analar men halyqtyń áleýmettik osal toptarynan shyqqan áıelderdi qoldaý maqsatynda birqatar jobalardy iske asyrýda.
