28 qazanda Astana qalalyq B.Maılın atyndaǵy №52 mektep-gımnazııasynda semınar formatynda «Biz - Alashtyń urpaǵy» atty kezdesý sabaǵy ótti, dep jazady "Adyrna" ulttyq portaly.
Alash ıdeıalaryn Nursha Orazahynovanyń «Satylaı keshendi oqytý» tehnologııasy arqyly mektep tájirıbesinde iske asyrý jáne olardyń eńbekterin jas urpaqqa keńinen uǵyndyryp, damytýdy maqsat etken bul sharanyń basty keıipkerleri ustaz ben shákirt boldy.
"Ult ustazy Ahmet Baıtursynuly mynadaı ósıet sóz qaldyrǵan: «Alashqa aty shyqqan adamdar! Kósemdikterińdi adaspaı túzý isteńder! Sender adassańdar, arttaryńnan Alash adasady, arttaryńnan ergenderdiń obal-saýabyna sizder qalasyzdar!". Sondyqtan, bizder, ustazdar qaýymy Alash zııalylary ańsaǵan urpaqqa tárbıe men bilim berýde ulttyq qundylyqtary boıyna sińgen Jańa Qazaqstannyń bolashaq tulǵalaryn qalyptastyrýdamyz. Búgingi sharamyz sonyń bastamasy dep oılaımyz", - dedi óz sózinde N.Aljanbaıqyzy.
Byltyrǵy oqý jylynan beri Astana qalasynda «Satylaı keshendi oqytý» tehnologııasy zerthanasynyń aıasynda B.Maılın atyndaǵy №52 mektep-gımnazııa, M.Shoqaı atyndaǵy №51 mektep-gımnazııa, №72 mektep-lıeı, S.Seıfýllın atyndaǵy №80 mektep-gımnazııa, «Sheıh Támım ben Hamad ál-Tanı atyndaǵy №85 mektep-lıeı» ustazdary qazaq tili men ádebıeti pánderin oqytýda Alash zııalylarynyń pedagogıka-psıhologııa, ádisteme salasyndaǵy muralaryn basshylyqqa alyp jumys jasap júr.
Mektep dırektory Ulbolsyn Bekmyrzaqyzy osy tól tehnologııany qazaq tili, orys tili, aǵylshyn tili, matematıka, tarıh pánderinde qoldanýdyń arqasynda 52-mektebiniń bilim sapasy 78%-ǵa kóterilgenin aıtty. 72 oqýshy halyqaralyq olımpıadalardan oryn alǵan. Al bul mektepte jalpy 48 synyp osy tehnologııany qoldansa, onyń 20 synyby - bárin tez sińirip alatyn 1-synyp oqýshylary. Sonymen qatar, osy ádisti meńgergen, qoldanatyn muǵalimder oqý- ádistemelik keshen jazyp júr.
Pedagogıka ǵylymdarynyń doktory, professor Orazahynova Nursha Aljanbaıqyzynyń Alash arystarynyń ıdeıalyq eńbekteriniń negizinde jasaǵan «Satylaı keshendi oqytý» tehnologııasy – uzaq jyldan beri óz ómirsheńdigin dáleldegen tól tehnologııa.
Is-shara barysynda atalǵan jobanyń qazirgi bilim júıesindegi orny, bilim alýshylardy tehnologııa boıynsha oqytýdyń mańyzdylyǵy, ana tilin damytýdaǵy róli týraly talqylaýlar boldy. SKO tehnologııasynda muǵalimder Alash arystarynyń mura etip qaldyrǵan naqyl sózderin kúndelikti sabaqtarynda tildik birlikterdi taldaýdyń nysana etip alyp, oqýshylarymen únemi oıtolǵaý jumysyn júrgizedi. Sol arqyly til bilimi salalaryn tereń, nyq meńgerýmen qatar oılaryn erkin, aıshyqty jetkizýge daǵdylanady.
Qoǵam qaıratkeri Orazgúl Asanǵazy ustaz ben shákirttiń sol daǵdylaryn tanytatyn bilim kórinisine tamsana kelip, osy joldyń muraty bıik ekenine senip, sáttilik tiledi. Al PhD ǵylym doktory, alashtanýshy, jýrnalıst Alma Saılaýqyzy “Maǵjan Jumabaıulynyń pedagogıkasyndaǵy ulttyq tanym” atty prezentaııa jasap, muǵalimderge Alashtyqtar artqan jaýapkershilik júgin naqty ulttyq sıpattaǵy mysaldarmen paıymdap berdi.
Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵy Ádisteme basqarmasynyń basshysy, f.ǵ.k. Jazıra Maqsutqyzy Ysqaqova jáne Y.Altynsarın atyndaǵy Ulttyq bilim akademııasynyń jetekshi ǵylymı qyzmetkeri Gúldarıǵa Merekebaıqyzy Kenjebaeva da bul tehnologııanyń tıimdiligi men mańyzyna toqtalyp, alǵystaryn bildirdi.
Rýhanı-tanymdyq bilim keshiniń sánin kirgizgen ánshi Jańabaı Ótegenov boldy. Halyq yqylasyna bólenip júrgen daryndy ónerpaz Maǵjannyń qos birdeı óleńine, atap aıtar bolsaq, “Túrkistan” men “Men jastarǵa senemin” óleńderine án jazǵan eken. Sol týyndylardy dombyrasyn kúmbirlete turyp shyrqap berdi.
"Adyrna" ulttyq portaly
